究竟係我庸人自擾? 還是係我太有經驗?
數日前同3隻豬仔沖涼, 我發覺達達毛根嘅顏色有D改變, 佢貼近身體嗰截毛色, 濕水後清楚見到帶有灰色一片, 我個心當下一沉, 反問唔通咁快又要再開戰?
但同佢吹乾毛毛之後, 灰色就再唔明顯; 我撥開豆b同波波嘅毛髪睇下入面, 都係貼肉嗰截係黑色, 其實已經有好多年; 再安慰自己, 可能咁都係正常狀況, 唔好做隻驚弓之鳥啦!
今日同佢哋日常清潔, 見到達達近尿尿嘅地方D毛毛痴埋一堆, 我就知真係又再嚟料:'(
達達開始甩毛之初, 佢下面都有分泌物, 我帶佢去睇過醫生, 驗查過D分泌物無色無味, 佢又已經絶育, 應該唔係生殖系統有病變, 叫我幫佢勤加清洗就算!
 |
| 前胸都未回復舊觀, 又嚟過? |
當時達達都未開始甩毛, 又無其他毛病, 咁我做法都只係勤D同佢清潔嗰度, 同剪短附近嘅毛毛, 一直都係咁做⋯⋯到佢甩毛⋯到生番好!
喺佢開始好轉嘅期間, 唔知幾時開始, 呢個清潔嘅程序已經無必要, 即係嗰種分泌已不復再見!
我開始將兩件事聯想, 係咪有呢種分泌佢就會甩毛?
今日又再為達達剪短尿尿嗰度嘅毛毛, 清潔又開始重做! 預期佢又會慢慢再度甩毛, 呢個轉變好緩慢, 先係毛根變黑, 毛髮變旱, 然後變薄, 直至甩到見皮膚⋯
人嘅忍耐、承受能力究竟有幾大? 佢前胸毛髪都仲未生好, 我又要從新再開FILE?
 |
| 2011年10月我發覺佢毛毛有異狀, 當時呢個樣你會話係我有問題? |
目前我要點做? 其實真係唔識做!
佢重有咁厚嘅毛毛, 又未甩毛, 搽油好似唔好, 食療我都無停黑酵母, 咁仲要點做?
有可能係我太緊張? 如果係就最好!!!
目前唯有再觀察, 著急都無用, 見歩行歩啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
