 |
| 相片連結 |
呢兩日都無同3隻豬仔出去, 琴日星期6同佢哋洗白白豬, 再修吓毛毛就差不多無咗大半日喇, 我同佢哋都一樣攰到CC :)
跟住比佢哋瞓新床仔, 真係好舒服, 軟綿綿彈性好好, 未洗到D棉花結埋一舊舊真係好正架!
星期日當然唔出去, 呢幾日一有時間就上網猛睇友善訓練論壇, 嗰度嘅忠告都係唔好比咁大壓力波波, 如果佢未ready好, 就唔好比佢接觸其他狗狗住, 同佢行熟同一條路, 等佢對場地有咗信心, 然後再試比佢見到其他狗狗, 未得又再還原; 所以暫時會揀無狗狗嘅時間出去,等到佢好relax, 先再試同一地點更改時段!
跟住再學吓點令到波波同豆b唔好打交, 網上話如果爭食惹爭端, 就要移除呢條導火線, 唔好比打交成為習慣先!
依家比小食, 每次比完波波, 即使豆b衝埋嚟我都唔會比佢住, 我會行開去, 等豆b跟我離開波波嘅位置先; 豆b唔喺波波旁邊佢無咁大壓力, 唔會搶嚟搶去, 所以唔會打交; 又如果太近距離開餐會打交, 就將距離分隔再遠, 目的係唔可以將唔好嘅行為成為習慣!
 |
| 波波無再用好凶嘅眼光望豆b喇 :) |
波波近來暴燥咗, 可能出去有唔好嘅經驗, 豆b都怕咗佢, 除咗爭食好少行過佢身邊; 經過幾日修正做法, 好似咁做真係有效, 最近對twins少咗打交啦; 一路睇一路學, 真係好多新知識要學番嚟, 今日竟然見到波波再同豆b一齊玩, 真係好開心呀!
 |
| 波波氹達達再玩過 :D |
至於達達豬, 自從佢開始長番毛髮, 都續漸回復佢本來性格 - 惡女一名; 不過好彩係雖然佢同豆b唔親厚, 唔會一齊玩, 但就無抗拒豆b嘅存在喇, 見到波波同豆b玩都唔會好似以前咁唔開心, 波波識氹番佢嘛!
我好疑惑究竟佢哋係咪同人類有相同諗法? 定還是係我一廂情願嘅代入感? 但真係每次波波同豆b玩完, 從前同依家都一樣, 波波都一定會再嚟搵達達, 再玩一餐, 咁達達就好開心喇!
呢兩隻豬仔, 總係比我一種感覺, 佢哋係注定要喺一齊 :)
 |
| 好sweet! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
