養得狗狗越耐, 越發覺要佢哋身心健康真係唔容易做得好!
最近重拾書本, 吸收多D養狗知識, 突然引發好多聯想, 又想起當年養狗狗嘅狀況!
最早期養狗狗, 完全乜都唔識, 無諗過乜嘢食物先係有益, 只知從寵物店買包狗糧, 店主話好就係好!
更無諗過狗狗都會有情緒問題, 不過又好慶幸當時嘅bebe, 佢好安定, 從無話唔開心, 有可能係我唔識, 仲無帶比佢情緒緊張 :)
打預防針都係頭嗰幾年有跟足, 跟住見佢健健康康, 就無繼續, 講真bebe真係一隻健康嘅狗狗, 無咩病痛!
因為知識貧乏, 所以bebe係無做預防心絲虫, 咩防虱防蜱嘅預防都無做, 後期亦都無打預防針 :)
依家諗番, 咁係好定唔好? 無咁多外來毒素去打亂佢自身嘅免疫系統, 依家嚟睇其實都無咩唔好; 可惜係最終佢死於心臟病, 後期都係一個折磨, 見佢抽筋好辛苦!
最後一年定期帶去睇醫生, 食藥; 從無研究藥物份量對佢嘅影響, 只識指示跟到足, 如果當日我識多D, 同獸醫多D商討, 佢會唔會救得到??
之後養4寶, 明顯壓力大, 安安自細就多病, 仲差D救唔到!
到樂樂, 叻叻同精精番嚟, 都好攞命, 樂樂番嚟未有兩週, 就要住院; 醫生話佢牙肉無血色, 嚴重營養不良, 我都唔知佢之前嘅主人係點養?
精精就唔使講, 當時生完BB又經歷BB夭折, 當然係好傷, 但當時都係唔識點幫, 食嘅用嘅當然比足, 但除此之外就唔識原來情緒問題仲可以尋求另類幫忙!
叻叻係我嘅心肝, 當日萬千寵愛, 但佢就一身係病; 甩清毛毛, 抽筋, 心臟病, 肝酵素高, 脫水, 腎衰竭, 肺積水, 仲要有幾多折磨????
6歲開始同醫療結下不解緣; 經歷無數風浪; 知得越多我越驚, 壓力無止境增長, 照顧叻叻患病嗰段日子, 係我人生中一個低點, 嗰種心痛, 不足為外人道!
有幾多深夜撲去急診? 幾多次住院? 幾多次抱住佢賴喺醫院唔肯離開, 怕一病發唔及時救到?
當時醫生都苦勸, 根本唔知幾時會病發, 問我可以點堅持得到!
然後被宣判死邢, 嗰時開始亂咁撞, 開始去搵中醫幫忙....
從嗰時開始, 我學習到唔輕言放棄, 幫得嘅都盡量去幫!
不過...有時會唔知自己做得對定錯, 要叻叻受苦耐咗, 但我清楚記得當日醫生叫我比佢安樂離去, 叻叻望住我嘅眼神係幾咁依戀, 我點可能就咁認命, 放手比佢離開....
到今日再回想, 我都係做唔到!!!
到今日養3隻豬, 希望可以養得好, 但過去經歷無疑係帶比我一D負面影響, 好少問題出現我都驚!
養波波初期, 肝酵素超標, 又開始情緒處於拉弓狀態, 但我唔會放棄每一個希望!
跟住達達豬又甩毛, 仲要不明原因, 咁點算好?
豆b又有氣管毛病, 仲要3隻豬都欠缺甲狀腺素....
今日托賴波波身體尚算健康, 但無疑我將佢縱壞晒, 變咗小霸皇; 一唔順意就情緒行為出咗軌道!
達達豬好幸運出番毛毛, 性格轉向正常 :)
豆b唯有小心呵護, 試用另類溫和方法去幫, 畢竟氣管呢類屬天生狀況!
至於甲狀腺問題, 還幸係屬甲狀腺素不足, monitor住病情補充番都無太大副作用!
今日嘅我會做多D資料搜集, 身體出咗問題, 係咪光信晒醫生就好? 仲有無嘢可以幫?
情緒行為出咗問題又點樣? 可以做D咩嘢幫忙??
上網搵資料, 再猛刨書本, 我希望養呢3隻豬會無悔無憾, 我100%鍾愛佢哋, 我願意為佢哋努力學習, 希望佢哋身心健康!
近日波波行為出咗問題, 當然係有誘因, 但係邊一樣? 我唔可以當作無事咁避開, 搵唔到原因我都係要嘗試去幫!
我最近睇咗幾本書, 其中呢本"別斃了那隻狗"真係必讀課, 無論有無養狗狗, 對人對事都帶比你一個正面嘅學習態度, 我推荐比大家, 真係唔好錯過!!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
