今日星期六, 以前我盡量唔出去, 正常情況都會比平日多咗狗狗散步, 費事波波又吠又撲咁麻煩, 呢種負增強唔控制會越嚟越壞, 目前我可以做嘅都係避開, 總好過情況變壞啦!
本來諗住同工人姐姐帶3隻豬一齊出去, 依家發掘咗條新路, 暫時未見到有狗狗行, 咁出去都無大問題喇!
不過工人姐姐好似鬼上身, 由早就一路做錯嘢, 要重做又重做, 真係麻煩; 可能佢比人追landing fee追到失魂落魄, 琴日郵差送掛號信按門鐘, 佢嚇到匿咗入廚房, 佢話驚到震晒; 一日唔解決呢個問題都比我麻煩, 即使我已經cut咗屋企條電話線, 佢做唔好嘢我都係慘!
眼見唔可以一齊出去, 無辦法唯有自己帶波波一個出去行, 反正波波係最需要多D練習!
同波波朝住新路進發, 雖然途中有狗狗, 但喺一定距離都無麻煩, 我手上準備好零食猛比, 好快就拋離佢哋!
轉入下一條路, 即將到達我心目中要去嘅嗰條街, 又碰到隻史納莎, 狗狗搏命衝前, 好彩有主人拖住佢咋; 我即刻帶波波轉身, 反方向行, 只要唔好四目交投就ok啦, 然後再繼續比零食!
明顯我嘅做法係唔想接觸狗狗, 但對方主人並無嘗試拉開史納莎, 眼見佢就嚟衝到埋身, 我唯有抱起波波等佢唔好睇; 隻史史到達我腳邊, 留低喺度左睇右睇, 我就忙於比小食等波波唔好吠!
但我耳邊聽到主人講嘅說話, 真係啼笑皆非, 佢同史史講,"望咩望, 人哋好巴閉唔理你呀, 仲睇!"
身為一個狗狗主人, 點去溜狗適當知識都應該具備, 人家閃避當然有難處, 何必講說話用咁嘅口氣呢?
即使係唔知"黃絲帶"行動, 見人家猛咁迴避都應該帶狗狗遠離, 比自家狗狗衝向他人同狗狗, 已經唔合理, 仲要口出怨言, 真係可悲!
我都想波波見到其他狗狗可以平靜行過, 都想佢有正常社交, 但我無你哋咁幸運walk dog可以揮灑自如, 我哋需要時間同勇氣, 可唔可以唔好帶狗狗逼近我哋, 比我哋適當空間同距離?
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
