 |
| 相片連結 |
又到咗狗狗約會嘅日子喇, 個心好興奮, 今日會多一個新朋友仔一齊玩, 真係開心!
V做暫養家庭, 今日會帶多一隻松松出嚟一齊玩, 好熱鬧; 佢幫一隻由繁殖場救出嚟嘅狗狗搵新屋企, 真係偉大, 呢個工作真係唔容易, 牽連感情問題, 到要分開嗰日一定感情受傷, 好唔捨得嘛; 但佢為咗幫狗狗, 明知要面對呢個局面都去幫, 縱使會難過都唔逃避, 只求幫到狗狗日後有幸福嘅生活, 傷心都唔介意; 比我一定做唔到, 實喊餐飽 :'(
V! well done, I'm proud of you!!
 |
| 希望再有機會同你見面一齊玩啦! |
諗起下次再出嚟玩已經唔會再見到呢隻花松妹妹, 佢已經去咗新家, 個心都有D唔捨得喇; 但咁快就搵到新屋企都係一份福氣, 我祝願小松松到咗新家有一個新開始, 永遠幸福愉快, 得爸媽疼錫; 過去坎坷嘅生活忘記晒佢啦!
琴日都好熱, 有D擔心, 咁猛太陽狗狗們走嚟走去, 會唔會中暑架?
出發途中比佢哋坐住私家車, 又開住風扇, 鋪好涼墊添; 但都係好熱, 沿路我不時向佢哋噴水, 仲擔把遮擋太陽, 真係皇帝出遊咁嘅場面 :)
 |
| 吹到波波條尾仔都飛起晒! |
終於到咗約會地點, 好好風呀!!!
點解盛熱之下仲會有一個地方咁涼快架? 香港地家家戶戶都開大冷氣, 熱氣排晒出街, 真係諗唔到有一個咁好嘅地方呀!
呢度無綠草如茵, 無小橋流水咁風雅, 但對我嚟講就好似世外桃園; 幾難得比幾隻豬跑嚟跑去, 唔使拖繩又唔熱, 一路見到佢哋D毛毛比風吹到飄飄吓, 真係好舒服呀, 工人姐姐坐低一陣都話想瞓覺, 太舒服喇!
呢處係私家地方, 唔可以隨便入嚟, 而V又做過長時間觀察, 呢段時間係無人帶狗落嚟行, 咁放開拖繩都OK, 我最怕有大狗會咬嘛, 去呢兩次都真係只有我哋喺度玩, 咁又安全好多啦!
 |
| 唔係有相為証我都唔信達達有咁既互動改進 :p |
琴日豬仔們表現一般都比上次好, 除咗達達,; 唔知係咪多咗個毛女孩, 佢覺得有競爭啦, 佢無上次咁主動去玩, 但都係在一個放鬆狀態; 除咗狗狗聞佢無發脾氣, 竟然會主動聞狗狗, 真係一大進步啦; 達達嘅行為情緒出問題唔係一朝一夕建立, 我亦唔心急佢咁快完全好番, 每次見佢有些微進步, 已經開心晒!
 |
| 可能有風, 豆b好舒服, 無氣喘, 波b都好放鬆 :) |
豆b今日都比上次進步, 比較relax, 所以條氣都無咁喘喇!
希望3隻豬多D社交生活, 性格趨向開朗啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
