琴日星期日無出去喇, 佢哋3隻豬自己喺屋企玩 :) 今日等傍晚無咁熱先出去行！
唔係好明白幾隻豬係咩心態, 無端端都會打吓交, 依家連達達都會撩交打, 仲要唔一定係有競爭; 話佢哋爭嘢食爭媽媽抱抱又唔係, 無端端都會撞嚟撞去打一餐!
有時見達達好似衝鋒車咁衝過去撞波波, 咁波波就鬼叫喇, 一反身就咬達達, 但好彩佢錫住達達唔會係好惡咁真咬, 一咬落毛毛就放口啦!
以前從唔覺佢哋會咁樣, 波波達達從來唔打交, 達達只會讓波波, 點會衝去撞佢呀; 雖然佢哋玩都係亂咁撞, 但唔同依家咁架; 今次達達生番毛毛後惡死咗好多呀, 以前雖然刁蠻, 但唔會惡波波嘛, 係好定唔好, 多咗互動好, 還是各有各玩唔埋斕?
波波對豆b就無咁和善喇, 豆b初嚟時佢哋關係無咁壞, 不過當時豆b唔會同佢咩都爭! 但佢哋又好奇怪, 話佢哋互相仇視又唔係, 佢哋又會一齊玩, 一齊企喺廚房門口等食餐.
不過佢哋會真打交, 係唔同達達, 唔分開佢哋打起嚟都幾可怕!
但我唔明點解, 佢哋有咩紛爭, 明明當時唔係爭零食, 又唔係爭寵, 好哋哋都扭埋一齊打大交!
反觀達達, 豆b初嚟佢明顯有唔開心, 會吃醋架, 但依家又反而同豆b無交惡, 見波波唔錫豆b, 無威脅喇 :)
猛咁刨書都唔明點解, 淨係知唔可以比打交成為習慣, 所以我好小心觀察佢哋嘅舉動, 好細微嘅安定訊號我都有少少把握喇!
依家見波波望向豆b, 豆b有時會撇頭, 咁就無事; 但有時豆b會瞪大對眼回望, 我會叫開個仔啦, 唔係望望吓就打架喇; 點解咁好火氣? 佢哋究竟傳遞咗D咩訊息, 點解會開打???
講番達達豬, 呢幾日無咗不正常嘅下體分泌喇, 今次一開始我就用神奇水同佢清洗, 咁就好番啦; 究竟神奇水係乜東東嚟架? 連內分泌噴洒外面都有幫助? 還是係有咁啱咋??
點都好啦, 有問題就諗解決方法, 咁早擔心都係自找麻煩, 暫時都係好好享受片刻平靜唔使打仗嘅時間 :)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
