呢兩日都係晨早同3隻豬出去行, 雖然有風無太陽曬, 但都汗流夾背, 氣溫熱就真係熱啦; 可能谷落雨, 琴日中午雨落到好大, 如果無改動時間又無得出去行; 但早上出去都真係好, 無細路無好多狗狗, 有都係一兩隻, 遠距離見到我就調頭行, 再行吓不同地方, 都好OK呀!
不過今日又有改動喇, 公眾假期早上都一定有狗狗行, 而且有雨, 唔出去喇!
最好嘅係因為移去咗trigger, 波波唔會吠同撲, 咁我行得好安樂; 達達都接受到新路, 因為無好大嘅車輛嚮鞍聲, 咁以後可以新舊路交替咁行吓!
本來諗住行熟一個地方, 但又要因應環境影嚮有所改動, 有時真係唔可以好似planned住咁理想; 出去行嘅時段都要有所改變, 天氣太熱有影嚮, 太多狗狗又無得行, 落雨更不在話下; 唔怪得先前睇短片戴醫師話無得planned架, 有少少明白喇, 但求隨心盡量去做好佢啦!
依家出去車仔都鋪上冰涼墊喇, 佢哋應該會舒服D, 喺咁熱天氣我都會將行程縮短, 3隻豬出去都係行個半鐘咋; 兩日來見到效果都幾好, 行完番嚟清潔好佢哋再瞓一大覺, 跟住起身食午餐, 下午仲有好多時間比佢哋喺屋企玩!
暫時又用住呢個計策, 因應情況再改動, 大家心情可以放鬆咁行.
我呢...都要早睡早起喇, 唔再做夜貓!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
