琴晚, 食完晚飯後自己一個落樓下, 呢個係熱門放狗時間, 我行咗過去放狗熱點, 我知嗰度每晚都有街坊帶狗狗聚集!
我想睇吓其他狗狗係點相處, 帶住波波無可能睇到啦, 不過見到多數係大狗, 我選擇企喺對面馬路遠距離望吓!
我見到有位伯伯拉住隻柴犬企喺度, 無幾耐有位女士同隻柴犬行埋去, 先前隻柴犬定住, 跟住聞地, 撇頭, 再企好!
呢個時候另一隻柴犬行埋去, 先互聞, 轉圈, 跟住轉轉轉跳嚟跳去, 佢哋嘅牽繩都絞埋一堆, 但主人都無放開手, 衹係就住跟佢哋跑嚟跑去!
要讚美呢種唔自私又負責嘅主人, 個個係咁就天下太平喇!
我見到兩隻狗狗嘅互動, 睇得好清楚佢哋有發出安定訊號, 原來係真架 :)
再望向其他狗狗, 有D係放咗繩跑來跑去, 又有細狗走埋去, 可能佢哋每日都聚集, 已經係熟絡咗, 狗狗可以玩埋一堆!
無帶住波波, 我過馬路行過去, 企喺細狗嗰堆!
其間都有見到有狗狗扯住繩要行埋去, 但主人唔比, 可能見到有放繩狗唔放心, 明顯唔係熟悉嗰一群人!
我企喺度睇, 就同狗主閒聊起嚟, 講起波波見到其他狗狗抗拒嘅問題!
有一位男仕嘅見解, 令我好似茅塞頓開, 佢不經意咁講, 波波唔鍾意見到狗狗, 就揾個適當時間落去, 避開咪OK! 何必攪到人狗都咁大壓力!
跟住又有人話波波社會化不足, 係好難靠咁行吓就可以唔撲唔吠架, 尤其係細狗, 天性係比較緊張, 因為聞到自己地盆領域比人低, 夲能見到狗就虛張聲勢, 要從細接觸其他狗狗, 社會化做得好先易話為!
跟住又有位女士加入閒談, 話朋友小狗都會又撲又吠, 事緣有次去狗公園, 佢哋放咗幾隻小狗喺小圍欄入面free run, 大圍欄就多數係大狗狂奔; 無耐有個男人拖住隻雪撬要入嚟, 叫佢哋同狗狗上番繩, 話佢隻狗好敏感, 唔可以喺大圍欄接觸其他狗狗, 會打交; 但大家覺得狗公園上繩無可能, 嚟得都係想比佢哋自由跑吓, 所以無理佢!
嗰個男人話隨得你, 照放隻雪撬入去, 有上口繩, 但就無用拖繩帶佢隨行; 隻雪撬一入嚟就追住朋友隻狗狗, 雖然無咬但朋友狗狗嚇到頼尿, 自始就神經質!
佢哋話有時唔係話唔教, 就算上埋堂揾教練都未必有效, 實在有好多人只諗自己唔顧人, 有時嚇親就好難攪, 一次心理陰影可能要一個月調較, 再嚟多次可能一年都教唔番!
有時受到環境因素, 同好多外來影響係好難控制, 唔係自己trained好咁簡單!
狗公園事件誰是誰非都好難定奪, 雪撬主人有事先警告叫大家拖番帶, 但佢自己又唔做, 只係上咗口繩唔比佢咬; 喺佢觀點因為狗狗會同大狗打交唔出去, 係保護狗狗, 入小圍欄帶上口繩已做咗應該要做, 佢咁大隻狗好需要free run, 就唔再考慮其他人!
做一個好主人, 當然要保護好自己狗狗, 但都要唔好比佢傷及無辜啦!
大家都覺得同狗狗出去散步係有必要, 但攪到人狗都有壓力就唔啱, 我嘅情況避開狗狗就OK, 唔需要將社交生活勉強加諸於佢!
真係咁簡單???
我話我都只希望佢見到狗狗直行直過, 唔撲唔吠就OK, 都無逼佢社交 :(
佢哋話唔得就由得佢, 見到狗狗掉頭行, 趕唔及抱起佢, 行遠咗再放落地, 移除令佢激動嘅環境就OK!
出去散步要身心舒泰, 咁大壓力有反效果更不佳!
諗番早日同波波出去行, 遇唔到狗狗真係輕鬆自在, 感覺真係好好, 咁何必一定要大家都咁辛苦呢? 試吓揾個適當時間避開吓, 大家情緒繃繃緊真係行咗都無益反而有害, 要社交都係喺圍內啦; 大家小朋友都係咁高咁大, 唔使諗地盆高下問題, 如果地點適中可以放繩嘅話, 就更家無壓力啦!
 |
| 開開心心咁行幾好!!! |
 |
| 召回練習都好成功! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
