 |
| 又唔覺佢哋有唔妥喎! |
天氣真係好熱喇, 死啦點出街呀, 中暑唔係講笑架, 唔通又祗可以晚上坐住車仔喺平台行?
今朝餵完早餐, 工人姐姐出去買餸, 我叫佢去行一round, 睇吓早晨有無狗狗行!
我希望呢個係上班時間, 唔係假期weekend, 有機會無狗狗啦, 咁3隻豬就改為朝早去行街!
等到姐姐番嚟, 佢話平常行嘅路好多狗狗呀, 不過佢無去晒之前我行嘅地方, 其他地點唔知喇!
咁即係叫我試吓其他地方, 舊路就唔使諗喇!
以往我多數中午出去, 博大家要食午飯, 唔會帶狗狗行; 但之前同3隻豬出去玩, 真係好熱, 我都有D驚會中暑, 隔一段時間都用水同佢地噴吓; 仲不停逼佢哋飲水, 又比PET SWEAT佢哋補充體力, 真係擔心架, 中暑唔講得笑啦!
最衰係波波啦, 唔見得其他狗狗嘛, 唔係晚上散步都唔知幾讚, 最怕佢又撲又吠好麻煩, 又怕再整傷條腰仔, 點攪呀?
唯有又諗傍晚啦, 希望出去無咁多狗狗行, 等佢哋食完晚餐休息夠, 再出動啦!
 |
| 睇樣好似係豆b嘔機會最大! |
點知都未食晚餐, 工人姐姐就話狗狗嘔呀, 但佢無見到係邊隻嘔, 咁先麻煩!
多於一隻狗狗就有咁嘅問題存在喇, 無可能24小時望到實, 一吓行開都會走漏眼!
我睇過D嘔吐物全都係今早食嘅早餐, 希望係食得太急嘅關係吧, 之後逐隻撿查, 睇吓牙肉嘅顏色有無蒼白, 又check埋體溫啦; 3隻豬體溫正常, 精神都唔差, 不過覺得豆b比較懶, 會係佢嗎?
到咗正常晚餐時間, 3隻豬都團團轉, 又唔見異常; 不過都係等佢哋餓吓, 再觀察耐D時間, 夜D都無事先食嘢啦, 咁情況都係唔出街喇, 開住冷氣大家休息一日啦!
近來多咗朋友問及想同3隻豬仔玩吓, 都收過好多pm問幾時帶佢哋出嚟玩, 真係好多謝各位嘅愛戴, 有咁多哥哥姐姐愛錫, 佢哋好幸福呀!
有好多唔同提議嘅場地, 有話去彭福, dog cafe....
但波波好麻煩架, 佢見狗狗要唔上繩, 唔係好癲架, 又撲又吠點攪? 我為咗避開其他狗狗諗到頭都爆 :(
彭福唔上繩我好驚呀, 有好多狗狗, 有大有細, 之前有網友嘅狗狗喺嗰處比狗咬, 我唔敢去啦! 咁大地方佢跑起上嚟我都唔夠佢快, 無圍欄會追唔番...又要顧住其他兩隻豬嘛; 而且依家係牛蜱高危時間, 我更家唔敢比佢哋去草地行!
我都希望同大家一齊玩, 但我船頭驚鬼船尾驚賊, 乜都驚一餐, 咁多顧慮你哋唔好見怪!
如果諗到適合地點, 或者可以聚吓, 起碼要知道無大狗嚟咬, 又唔會失散啦, 3隻豬一個跑東一個跑西好難攪, 早兩日3人3狗拖埋繩我都攰到CC吓呀!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
