 |
| 撇頭＋打喊露 |
因為波波, 我對狗狗安定訊號多咗留意, 好多時都會留意3隻豬嘅舉動, 尤其係波波, 佢發出嘅安定訊號好明顯, 只係我以前唔識:(
原來佢出去碰到其他狗狗真係有好大壓力, 呢個都係D放繩狗嘅遺害佢仲未能抵消, 最初同佢出街從來都無呢類問題存在, 但近年就好明顯!
依家睇得到佢因咁有不安, 就盡量避免, 為免其他狗狗距離過近會產生排斥力, 我避得到都盡量去避開, 起碼咁可以比佢輕輕鬆鬆咁跑番轉!
 |
| 企定但縮起前手 |
 |
| 定格 |
 |
| 打喊露 |
 |
| 撇頭＋坐下 |
 |
| 瞇瞇眼＋舔鼻 |
一旦發覺佢哋發出訊號, 我盡可能都由得佢哋選擇, 盡量配合好, 不過有時真係逼不得意!
好似同佢哋沖涼, 佢哋都算合作, 但吹毛就真係好攞命, 左扭右扭; 我都明白呢個程序好唔舒服, 但又唔可以省卻, 怕濕身會冷親, 咁點算好?
好清楚佢哋不停比出訊號, 但我又唔可以唔繼續做, 除咗用聲線安撫, 唯有我都相應咁做出安定訊號啦; 有時都覺得自己好似個傻婆咁, 對住佢哋又貶眼, 又舔脷, 又「打喊露」,真係幾好笑, 但又唔可以唔盡努力去做 ;)
 |
| 唯有盡量安撫，一齊做安定訊號 |
最近上網睇到有D狗狗相片, 尤其係DOG CAFE嘅公關狗狗，以前我無留意到; 但最近見到嗰D狗狗, 佢哋比客人抱住, 好多時都有做撇頭, 舔鼻, 縮起前手等等動作, 美其名係同佢哋玩, 但其實都係娛樂客人, 不停有陌生面孔嚟抱佢哋, 我諗壓力都唔少!
不過人類番工都要面對壓力啦, 作為一隻公關狗狗, 份工都唔易做呀!
最後, 都係要不厭其煩喺度再講多次, 為人為己, 喺唔適合嘅地點請將狗狗拖好, 一來為自家狗狗嘅安全起見, 二來你未必想像得到, 比你嘅狗狗衝向其他狗狗, 即使唔咬, 但都有可能會做成其他狗狗有好大嘅心理傷害!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
