今日母親節, 祝各位媽媽(包括毛孩嘅媽媽), 母親節快樂!
今日工人姐姐放假, 唔可能一拖三落街, 等晏D老工番嚟, 我先逐個帶!
一個人咁得閒要搵D嘢消磨時間, 先同佢哋影幾張相, 慶祝母親節啦; 見到達達毛毛亂七八糟, 都係要親自操刀修一修喇; 本來對待達達嘅毛毛好似珍寶, 唔敢輕易落剪架, 但越睇越唔順眼, 都係修修尾尖嗰度啦, 都唔可以叫做剪毛卦 ;)
下午老公番嚟, 我就帶波波落去散步, 我好好彩揀啱時間, 途中只係遇到一隻金毛, 仲係好遠距離, 所以我避得到, 好幸運無挑起波波嘅激動; 一路行都好輕鬆, 亦體會到召回訓練真係好有用, 例如我唔想波波行埋人家狗狗留下嘅便便, 可以叫到佢番嚟我腳邊跟從; 見到小朋友亦趕得及佢未吠前比小食等佢停口, 今日出去佢一聲都無吠過, 我真係好開心呀!
不過相信近距離遇到狗狗就唔係咁輕鬆, 都係keep住迴避呢個策略好喇!
行咗好relaxed嘅45分鐘就返屋企, 今次係近日我最稱心滿意嘅散步!
跟住第二輪就帶達達豬, 落到去好似同剛才係兩個世界, 滿街都係狗狗!好彩達達豬一向都係自顧自咁努力行, 只要其他狗狗唔過嚟打擾就ok喇; 先後見到好多隻poodle, 全部都有拖繩, 我好放心; 遇到一隻朱古力色poodle, 佢見到達達係咁向佢衝過嚟, 我即刻叫佢主人hold實, 面對面咁衝過嚟, 達達一定發脾氣; 佢主人話ok, 見到達達條黃絲帶, 記起我上次嘅講解, 佢話佢明白!
好開心講咗咁多次終於見到有人會記住, 黃絲帶萬歲!
之後再遇到兩隻放咗繩嘅松松走過嚟, 好彩佢哋行得慢條斯理, 跟住我哋後面猛咁聞達達豬, 不過達達無理佢哋!
第三次落去輪到豆b, 天色開始暗喇, 同豆b散步係完全無壓力, 拎住零食氹吓佢就OK; 行咗30分鐘就返屋企, 準備今晚阿女同我出去食晚飯, 慶祝母親節:D
多謝阿女送比我美味嘅曲奇, 母親節蛋糕同安排啱晒我口味嘅晚飯, 佢知我無蝦不歡啦, 哈哈哈...
今晚有我心愛嘅龍蝦同大蝦球, 真係好好味, 佢又知我懶, 最怕剝殼嫌麻煩, 全部起肉嚟整最讚!
多謝阿女窩心嘅安排, 呢份心意我收到晒, 今日呢個母親節事事順心, 真係由朝開心到晚 :)
祝願大家今日都有一個好開心嘅母親節XX
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
