 |
| 睇呢張相好sweet呀, 真係唔想比大家睇真相, 但click入相部, 哈哈.... 相片連結 |
姐姐們一齊拉大隊往加遊, 去探望移民加拿大嘅姐妹, 當叫我一齊去嘅時候, 我當然係耍手兼擰頭啦; 要我拋開3隻豬真係會牽腸掛肚, 點會玩得開心?
佢哋話我咁點得架, 為咗幾隻狗真係邊度都唔去? 咁都甘心?
好多朋友都覺得我犧牲好大, 為咗3隻豬謝絕旅遊, 但在我嚟講真係無研究, 哈哈...
其實我一直都唔愛好旅遊, 可能我無方向感, 一離開熟識嘅地方, 我就騰騰震, 無晒安全感; 天生我好似難辨方向, 成日迷路, 即使去過好多次嘅地方, 再去都係要重新摸索, 路盲到嚇親人!
我記得幾年前喺英國嘅機場,入咗洗手間都會迷路, 已經叫咗老公喺門外等我, 一步都唔好行開; 但到頭來行番出去見到地方唔同晒, 又唔見咗老公喺門口, 真係嚇親! 之後入番去再慢慢諗, 原來係行錯方向, 洗手間有兩個們口 :(
另一次又係洗手間迷路, 嗰次同阿女, 老公喺美國一個廣場, 我又係入咗洗手間, 嗰次我以為自己好叻, 入門後就望吓週圍環境, 見到門口旁邊有座好似扭蛋機, 諗住出去見到呢座嘢包無錯卦, 結果都係迷路; 嗰個洗手間又大, 轉咗兩轉我仲邊記得出口?
見到座扭蛋機以為唔會錯, 但原來部機個個門口都有, 仲要有好幾個出口!
唉! 真係玩死我 :(
又有一次同阿女去臺灣, 我叫自己要認吓路, 認清楚去過嘅地方...
結果同啊女行咗一陣, 我話我認得呢度琴日嚟過... 阿女瞪大對眼問我係咪夢遊; 我指住一條天橋話琴日見過, 激到阿女跳起, 佢話地方咁大天橋度度都有!
佢話其實帶我上太平山頂話去咗馬爾代夫都得喇, 真係攞命 ;p
凡此種種烏龍事數都數唔晒, 好次喺車頭落咗車, 轉兩轉又喺車尾上番車等等!
去陌生地方我好大壓力, 又唔認得路, 我點會鍾意旅遊?
即使喺香港我都唔會週圍走, 明明係香港人, 唔係拎住地圖就要沿途問路, 真係好醜 :D
認路真係我一個盲點, 由細到大都無進步, 都唔知乜嘢因由 :P
做人要知道自己嘅弱點, 盡量避免出錯嘛; 倒不如留喺屋企同3隻豬仔一齊仲開心; 好似今日淨係睇住兩隻豬玩到推嚟推去好似玩摔角, 已經係我最佳享受 :D
正所謂"甲之熊掌 乙之玭霜"就係咁來由!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
