以為自己改變好多, 生死睇化咗, 原來當D豬仔有事, 我一樣係會被嚇傻!
琴晚餵完3隻豬晚餐, 放番波波上床, 佢應該唔記得琴日同豆b打交激嬲咗我; 都算係罰過, 自己唔睬佢仲心痛囉, 抱番佢上床瞓覺!
一路都好平靜, 3隻豬瞓覺, 我就如常上網啦; 一路到我晚飯時間, 點解我覺得波波好懶, 唔願郁個樣又好慘?
3隻豬每晚都係同一時間食蕃薯加眼仔supplement, 正常佢哋好巴閉呱呱叫㗎!
見到波波吽吓吽吓, 第一時間探熱啦, 嘩, 40度, 嚇死我!
開始手騰脚又震, 個腦一片空白, 如果當時量我血壓, 一定爆燈!
記起買咗順勢退燒藥, 拎出嚟試吓, 跟指示再加埋消炎藥, 但食咗幾次都唔得; 隔咗半小時後, 都係要食H醫生配定比我用嚟看門口嘅退燒藥喇, 希望退到燒, 捱過一晚再去睇H醫生啦; 等咗半個鐘, 無退燒仲升到41度, 好驚啊!
即刻要搵Hsiang醫生, 唔再等上網問, 急call姑娘姐姐叫佢幫我問問; 好快Hsiang醫生回答, 叫我盡快去24小時診所, 唔好等!
點解發生呢D突發事總係喺夜晚 :(
我最怕就係搵無睇過佢哋嘅醫生!
即刻同老公抱住波波飛的士去太平道, Hsiang醫生話會將病歷fax過去, 本來我已經擔心, 見到H醫生咁緊張真係嚇到我有D頭暈!
到達診所探熱係39.6度, 稍有降溫; 急診醫生問一般相關問題, 我照實回答, 的確波波一整日都好正常, 無痾嘔有正常大小便!
開始做檢查, 聽心肺然後按壓, 按到膀胱話好脹, 有無谷尿尿? 波波出門前我有比佢尿尿, 好大篤喎, 可能係我灌水多咗; 醫生話其實佢無口渴, 係我硬要灌囉, 咁做其實對退燒幫助唔大!
外國醫生觀念真係唔同中國人, 我哋嘅認知一向都係發燒要飲多D水去降溫!
跟住按到去頸, 波波有叫, 醫生就話波波頸仔有腫, 佢有痛, 係頸椎問題, 但唔算嚴重, 要食藥休息困籠!
但我有D懷疑係按得太大力整痛佢啦, 波波活動正常, 行得好好, 頭仔又識兩頭轉嘛!
真係又嚟頸椎問題? 波波已經腰仔有唔妥喇 :'(
原來之前我係有食啱順勢藥㗎, 但始終藥效溫和, 對來勢洶洶嘅病情係無用!
見到醫生開嘅藥真係好唔想食, 但又唔敢; 我都有將想法同醫生講, 佢問咁要唔要藥呀?
我有講懷疑豆b食咗呢類藥生脂肪瘤, 停藥後無晒; 佢當然不置可否啦, 但有去睇豆b病歷!
醫生話佢開嘅藥唔同, 劑量好輕微, 因為睇豆b食嘅藥比波波更重; 佢話食5日問題唔大, 其實唔使太擔心!
我可以揀咩, 咁急嘅情況順勢藥又唔得, 無得選擇啊!
唯有食完藥再做番排毒啦!
但點解波波頸椎痛嚟得咁突然, 唔通同豆b打交時整親? 頸痛會發咁高燒咩? 我好有疑問!
好彩豆b無事, 唔係兩個一齊我就死得喇!
睇完醫生出門口, 放波波落地, 膀胱脹應該要尿尿喇, 果然屙咗好大篤 :p
番到屋企報告情況比Hsiang醫生, 都係要再問咁情況都會燒嗎?
Hsiang醫生話有痛, 肌肉震動, 有可能引發高溫, 但絕對唔會去到41度, 一般要住院觀察㗎; 波波咁情況係有D奇怪, 再小心觀察佢有無其他啦!
對今次急診我好有保留, 再聽H醫生咁講我仲擔心, 係驚有其他問題未發覺有延誤, 但無病徵出現又點去搵呀?
Hsiang醫生話有醫生望過, 波波又有降溫都唔使太擔心, 之所以咁緊張叫我去急診, 因為如果狗狗體溫高達42度的話, 有可能會死㗎!
好彩Hsiang醫生依家話我知, 唔係我實脚軟唔識行!
每小時都幫個仔量一次體溫, 我點敢去瞓!
今朝早餐波波有食晒, 胃口正常, 有正常尿尿, 但都仲係有燒, 探熱係39.6, 真係擔心!
都係每小時keep住探熱, 去到38.2, 較安心, 除咗好攰, 未見異常, 希望波波免疫系統夠強, 可以自己打勝呢場仗!
真係好多謝H醫生, 佢真係大好人, 每每肯解答我問題, 琴晚同我傾到12點呀, 仲要話辛苦我喇:')
仲要多謝Hsiang醫生助理M姑娘姐姐, 即刻幫我搵Hsiang醫生!
真係慶幸遇到Hsiang醫生, 成個team都咁好人!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
