 |
| 相片連結 |
琴晚半夜達達又叫醒我, 抱咗佢出去尿尿, 之後放番佢落床, 但佢又扭計, 吖吖咁叫喎!
達達越大越扭計, 好多要求好曳曳, 完全係BB扭抱嘅模式, 性格越老越變細, 人就有謂'老人成嫩仔'，乜原來狗狗都會咁? 真係難估計!
每晚臨瞓都會叫3隻豬仔先去尿尿, 之後就可以一覺瞓到天光, 咁耐以來都無問題; 但達達最近勁唔合作, 係都要半夜嘈醒我, 有時尿尿完都乖乖瞓番, 有時就要扭計上我床 :(
我嘗試ignored, 每次都得呈會助長佢嘅詭計, 次次都係佢嬴我會無命; 抱佢上床又要抱埋波波, 又會攪到我成晚半睡半醒 :(
但佢又嚟打持久戰, 吖到唔收聲!
嘈醒老公唔在講, 已經夜闌人靜, 嘈到鄰居就大劑, 怕比鄰居投訴, 最後都係比佢鬪嬴!
終於兩隻豬仔上咗床, 我又要就住就住, 要保住老公唔會踼到佢哋, 唔使瞓囉; 好彩豆b好安份, 佢對自己張床仔極有安全感, 就算比佢上圍欄床, 佢都瞓得不安!
豆b每晚都喺自己張床仔乖乖咁瞓天光 :)
都好似未瞓過就要起身, 要餵3隻豬仔早飯, 早餐後量過波波體溫仍屬正常, 希望今次唔會再反覆又病喇!
我湊呢3隻豬仔完全同湊個BB無兩樣, 煲粥仔、燉湯, 眠乾睡濕, 攰到我傻咗 :)
其實係咪我祇有一個獨生女, 當佢已長大, 唔再好似细個咁依賴我, 我有失落?
而喺呢3隻豬仔身上我可以搵到我失去嘅感覺, 潛意識我對做媽媽嘅職責好嚮往?
琴日姐姐又講起旅行, 我當然無搭口, 佢叫我養完呢竇狗狗唔好再養, 要適放自己去吓旅行!
講真我從來無羨慕過人哋去旅行, 唔去我唔覺得係犧牲, 其實呢個都係一種選擇, 如果我覺得旅行, 比我嘅快感大於對住狗狗, 我一定可以安排到唔會咁困身; 世界上唔會有100%嘅人, 養咗狗狗就唔去旅行啦, 衹係我對住3隻豬仔, 得到嘅樂趣更大, 所以我願意付出代價去换取我嘅開心!
所有事物都係等價交換, 衹係有D係無形嘅付出, 而得到係無形嘅快樂; 唔係用錢買張機票, 週遊列國嗰種實質見到嘅開心之嘛!
世界上邊會有一面倒嘅奉獻而全無渴望回報? 即使父母愛子女無私心, 睇到佢活得好會感覺安樂, 都係一種回報; 施捨個乞兒令佢有得著, 都比你有幫到人嘅快感, 都係回報啦; 我養呢3隻豬仔, 真係好難向無養狗狗嘅人解釋嗰種感覺, 但必須承認事實, 佢哋比到我極大滿足感!
見到佢哋將個頭仔挨向我身, 我個心就已經樂透!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
