唉 ! 最唔想講嘅話題!!
今日又嚟講醫療失誤, 當然呢度講嘅係狗狗啦!
呢件事我係從facebook上得知, 雖然我唔識事主, 但我哋係同一群組, 所以整件事從一開始我都有關注; 一路有追住post, 當然係關心狗狗, 希望佢無事!
事主嘅狗狗發生呢件事, 初時當然係六神無主, 及後就好激氣, 佢喺fb上吐苦水, 話未收到refund就受到不禮貌對待, 激到一肚氣, 要將件事廣傳開去!
事緣有日早晨剛起身, 事主驚見狗狗隻眼好凸, 佢好驚即刻帶佢去睇醫生啦; 點知個外國女醫生一望就話要切眼球, 話一定係有過意外發生, 碰撞到個頭, 先會搞到咁!
醫生話要盡快安排做手術, 為免感染細菌; 因為狗狗眼仔已經神經壞死, 冇咗功能!
事主心亂如麻又愛兒心切之下, 就答應翌日做手術; 但呢間診所好怪, 佢唔係叫事住落訂金, 要全數手術費比晒, 咁事主就照辦啦!
之後上fb講起呢件事, 大家都話摘除眼球唔係小事, 一定要搵多個second opinion, 提議帶狗狗去太平道診所睇專科; 由於無得即時睇眼科, 事主就帶咗狗狗去睇急症喇!
急症科醫生話有兩個選擇, 可以係切眼, 但仍可以試試睇吓救唔救得番; 提議將眼睛縫埋, 等兩星期睇睇隻眼仔可唔可以自然縮番, 是否可神經修復, 到時由眼科醫生跟進番, 如果好彩無失明當然唔使切眼!
咁情況事主梗係照辦啦, 有一線生機唔使切眼喎!
事主同原來診所通電話, 話唔做切眼手術喇, 希望可以refund啦, 但姑娘建議手術費keep住先, 如果眼仔真係失明, 喺佢哋度做手術平D嘛, 而且refund無先例, 要問過老細啦, 應該唔會refund全數㗎!
當時事主無心情斟酌喇, 都仲擔心緊狗狗唔知點啦, 錢就後話!
呢兩星期佢keep住updated狗狗情況, 每過一日佢都好緊張啊, 臨近揭盅嘅日子佢話唔使瞓喇, 當然即使我哋唔相識, 都盼望佢狗狗眼仔無事啦!
終於到覆診日期喇, 眼科醫生拆線前都叫事主要有心理準備, 如果失去視力就無得選擇, 要摘除眼球喇!
之後....醫生小心檢查, 做咗幾個測試後, 話狗狗眼睛可以保留, 視力回復正常, 好好彩無盲啊!
真係天大喜訊, 連我都好好好開心!
係邊間診所咁草率斷症我唔開名喇, 唔係我親身經歷我唔想評論有偏差!
但好痛心真係有呢D獸醫, 斷症可以咁兒戲行事? 還是為咗賺取手術費就掉以輕心, 無仔細確診, 咁隨便就決定要幫狗狗切眼?
如果當日事主無上網講及, 信任晒呢個醫生, 咁狗狗嘅餘生就得番一隻眼喇!
請各毛孩嘅家長遇事真係要冷靜, 處理要小心; 又一個事例引証, 當遇到大件事一定要尋求second opinion, 我好明白有起事嚟嗰種慌亂無助感, 會驚到手騰脚震; 咁就同朋友家人商量吓先, 過一過冷河腦筋會清醒番嘅!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
