 |
| 今日精神好好多喇! |
波波唔舒服轉眼已有一個星期, 見住佢體溫上上落落, 真係無時安樂, 已經好耐未試過有一晚可以一覺瞓到天光; 即使早兩日佢體溫正常, 我個心仍係忐忑不安, 搵唔到發燒嘅原因, 總係怕會改變情況!
果然, 好咗兩日咁多, 高燒又嚟過!
我總覺得佢有炎症, 就用發燒去打仗囉, 但搵唔到根本, 都唔知做D咩嘢會有幫助, 如果反反覆覆咁拖, 好傷身喎!
琴日發燒, 食咗一次藥燒就退咗, 呢隻藥應該藥性頗強, 唔怪得會傷肝; 既然退咗燒梗係停啦, 希望再食一次咁多唔會太大為禍; 但就咁觀望咩都唔做, 又可能會再燒過喎!
開始從頭仔細去想想整個情況, 去做一個大綱......
將波波近日表現去細想, 佢口氣有異常, 仲成日有咀嚼動作,早前比零食大粒嘅唔要, 唔通元凶係口腔?
口腔牙肉發炎引起發燒現像?
雖然我有張開佢口仔望過, 但望唔到裏面嘅情況, 亦唔識判斷有無異狀; A就話覺得佢牙肉有腫, 但我睇又唔多覺!
條片係早兩日發燒時拍低, 覺得佢口仔有異狀!
驗血見唔到有好大異常, 照xray又睇曬D內臓, 心肝脾肺腎, 氣管膀胱都幾好, 咁邊度會咁大影響? 自然又去番我最擔心嗰樣!
其實呢個問題我一直都concerned, 當日高燒去太平道急診我都有講, 我話見波波口仔動作有異常; 醫生掀起波波個嘴仔望咗一望, 又話not too bad; 到去Hsiang醫生我都有再問, 但佢又話好少有牙齒問題影響到發燒情況!
3隻豬牙質都唔好, 就算洗牙後都好快有番牙石, 佢哋身體情況又唔適合麻醉, 無可能再比醫生用洗牙去幫, 我都唔知點先清潔到佢哋嘅口腔 :(
話有刷牙都好難做得仔細, 一來佢哋口仔咁細, 二來佢哋唔肯張口配合, 我祇可以同對孖胎輕輕刷到前面; 後面嘅大牙, 根夲無法觸及, 即使我有做都等如係廢!
拎上次比達達用嘅牙齦炎藥出嚟, 再上網睇睇, 睇吓有無可能有幫助!
見到有D review 都有提及, 狗狗有牙肉發炎, 而引致發燒, 有用過呢組藥; 咁我都不防試吓, 希望可以做到對症下藥, 幫到波波啦!
琴晚先開始食藥, 只係食到兩次, 萬望呢組順勢牙齦炎藥有幫助, 波波平安無事唔會再燒過; 呢個星期真係精神極度損耗, 好驚一瞓會瞓到天光, 唯有較好閙鐘, 要監察住波波情況!
半夜起身兩次探熱都係37.4度, 算係暫時穩定, 反正惘無頭緒, 就循住口腔呢個方向去幫忙!既然今次發燒唔係因為太平道急診判斷嘅頸椎問題, H醫生做咗血檢拍片又搵唔到係乜嘢情況, 就唯有靠自己去摸索啦; 雖然獸醫係專業, 但單憑就診嘅短短時間, 唔會清楚過我每日嘅仔細端詳啦 :)
 |
| 無燒表情唔同晒, 有番興趣玩喇! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
