姐姐過世轉眼快兩個月, 今日係上位嘅日子, 將骨灰好好安放!
兩個月以來, 好多時都會想起佢; 去茶樓飲茶, 會記起佢講邊度點心好食, 邊度已失水準, 要black list ; 感覺佢從無離開, 今日見到個灰盅, 面對事實, 好唏噓, 好掛住佢!
有事要出去, 當然唔放心留低波波, 一早已作出安排; 已經叫老公攞假, 由佢負責餵藥, 照顧好個皇帝仔!
波波狀態仍穩定, 今日探熱38度, 保持住體溫正常, 希望唔會再好事多磨, 嚇到我無命!
呢個星期我極速減磅, 無咗3磅多; 雖然減磅係我嘅要務, 但因為咁瘦, 我寧願加夠double囉!
一個人要改變性格談何容易, 所改動嘅都只係一種姿態, 漸漸自己都比演技蒙蔽, 以為自己放得開; 但其實天性有如老樹盤根, 根深本固, 根本無可能移動分毫; 每每以為已經睇化咗, 都只係於事後回望, 當身處其中, 就唔係口講咁輕鬆喇!
我都曾經以為自己已經放開, 以為自己可以凡事唔睇咁重, 好多大道理大家都懂, 但真係要做得到, 簡直係天材; 我放棄再叫自己睇開, 壓抑反會做成更大傷害, 天生我係咁緊張無得改, 我都係忠於自己, 無謂做成心理障礙喇!
我承認自己性格係緊緊張張, 焦慮時標晒冷汗, 有突發事手騰脚震, 擔心時仲會頻頻上廁所, so what?
性格上嘅弱點真係無得改, 遇上壓力控制唔到更無奈, 遇事過份認真係蠢材!
我諗我嘅性格會跟我一世, 直到進入棺材 ;)
