波波咳咳呀!

好彩隻豬仔精神唔錯都無咁擔心!

近日都唔知發生乜事, 一家大細都忙住睇醫生!
真係一波未平, 一波又起, 屋企各人病後都未清底, 今次竟然輪到波波!

琴日日間, 聽到佢發出有'卡卡'咁聲, 我都無為意, 以為佢D毛毛卡住喉嚨, 想咳番出嚟; 見佢精神胃口都良好, 而且卡咗幾吓, 就停咗落嚟; 一整日見佢都無乜毛病, 只係間中會'卡'幾聲!

都瞓得好好我就較安心!

其實狗狗間中咁卡幾聲清吓喉嚨, 養狗咁多年我都司空見慣, 所以無諗過要延醫診治; 到咗晚上, 佢卡嘅次數比日間多咗, 我開始警覺, 應該唔係有毛毛黐住喉嚨"鼎"喇, 佢應該係有咳嗽嘅病徵; 不過琴日係端陽, 而嗰時又係晚上, 都唔會有醫生當值, 咁佢又唔算係急症, 我無諗要去睇急診咁誇張!

 

今日一早起身, 又見佢再次卡卡咁晌, 雖然好快停咗, 但我確定咁係唔正常, 呢D唔似係日中清喉嚨嘅現像, 應該要見醫生喇, 於是一大清早, 就去做booking!
可惜星期日Tung醫生全都fully booked囉, 而Hsiang醫生今日又無當值!

見波波都無乜特別唔妥, 都食得瞓得精神都好好, 咁就約咗明日中午去見Tung醫生啦!

一般傷風咳嗽呢D小毛病, 我都會近近哋去睇家庭醫生Dr.Tung, 不過佢診所無一般醫院嘅設備, 要驗血照X'ray就一定要搵H醫生; Tung醫生同Hsiang醫生都係我嘅首選, 佢哋係咁多年我遇過最好嘅醫生 :) 當然呢個係主觀意見, 事實上同醫生構通, 配合, 態度等等, 都因人而異, 都係俗語講嘅要"夾"到先得!

我覺得佢哋個性好唔同, Hsiang醫生比較開放, 比較接受一D唔係正統療法, 亦唔會太抗拒比佢哋服用supplement, 講明白D係比較彈性處理問題, 睇佢我感覺會輕鬆D, 可能係佢年紀關係!

但Tung醫生就比較保守執著(唔係老呀, 不過我估應該年長過Hsiang醫生 :D), 但我好欣賞佢睇症果份專注, 堅持同認真; 佢係非常小心嗰類人, 對於一D佢唔肯定嘅補充品, 甚至係乾糧牌子佢都唔會建議, 最好笑係佢每次都會講"依家唔準沖涼, 唔好冷親",咁我要自己拿捏邊個時候要搵邊個醫生喇!

希望等多一日波波唔會嚴重咗啦......
可惜我既無宗教信仰, 唔會去祈禱; 更加唔會落鵝頸去打小人(有小人咩 :D) ,又唔識係咪叫做犯太歲, 但點解近日總係被呢D小病纏身???
唉! 唔該真係快D好番啦, 真係好困擾呀!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！