狗狗網站

波波當年有事,我得到好多嗰個網主嘅鼓勵!

呢幾日都唔可以登入某寵物網!

3年前見証住呢個網誕生, 而嗰時我都仲係上網新手, 好多嘢都糊里糊圖; 係呢個網嘅網主, 教導我好多電腦上嘅知識, 仲幫我解答咗好多電腦難題, 我仲記得通過電話, 佢一步步咁教我修正上唔到網既疑點, 當時真係好驚自己點極都唔明, 電腦白痴真係唔可以唔認, 但得到佢不斷鼓勵, 仲話我一點就明! 

到今日我仍然好多謝佢比我多方面嘅支持同鼓勵!　

嗰個網新開張嘅日子, 睇住一個一個網友加入, 我哋每日都有傾談; 遇上狗狗有麻煩, 大家都會互相鼓勵, 一般人話電腦網上係一個虛擬嘅世界,唔會有真心朋友,  但我從來無咁樣去想; 每每養狗狗遇上問題, 一放上呢個網, 大家都會各自搵料, 互相幫忙!

可能嗰個網無特定品種嘅狗狗, 唔會有互相比較, 我好懷念養住不同品種嘅狗主, 各自講佢自己狗狗遇到嘅麻煩! 我記得嗰時, 波波個肝有事, 喺嗰度得到好多鼓勵, 佢哋搵咗好多不同嘅資料, 為我post上嚟!

有時同網主私下傾談, 都知run一個網站唔容易, 而佢工作亦非常忙碌, 漸漸見佢自己都好少上嚟; 又睇住一個一個日日傾談嘅網友慢慢離去, 到呢兩日個網仲唔見咗, 我感覺好唔開心, 好似一段段友誼, 已經到咗無疾而終嘅時候, 有D難過, 有D不捨.....

係咪我個人太睇重網上友情, 根本不合時宜? 但無論點都好, 我都好懷念嗰段日子, 同每位網友嘅網上友誼!

希望有緣再遇上, 願佢哋嘅狗狗都身體健康!


多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！