論盡工人 - (1)

3隻豬都瞓得好舒服!

 今日唔係講狗狗, 變為僱傭論壇, 谷埋谷埋都要呻吓嘛! 

今日工人姐姐放假, 屋企頓時變得好寧靜, 我開咗狗狗音樂, 放咗3隻豬仔上床, 等佢哋好好睡個晏覺, 我就坐喺傍邊張檯, 做吓小手功; 好享受呢一片寧靜, 3隻豬一定與我有同感, 佢哋瞓得好安寧!

如果唔係自己懶惰, 真係唔想屋企多咗個人, 呢個姐姐做嘢成日砰砰硼硼, 發出好大聲晌, 攪到我同班豬仔都神經緊張!

其實係咪所有工人姐姐都係一個樣, 一做耐咗就氣燄高張; 我呢個姐姐學歷算高, 所以佢談吐都頗為驕傲; 做錯事永無講句對唔住, 聳下膊頭就算數; 仲要好老實咁同我講, 唔係為錢點會為我放下身段嚟做工!

唉! 佢係咪都有公主病? 出嚟做事要知分寸, 要知自己嘅positioning; 唔高興可以唔好applied呢個工種嘛, 何必要令到大家都面膿膿! 我自問唔係無良僱主, 需索無窮, 但基本要求一定有, 例如叫佢熨衫先要睇標籤, 煮餸要分清楚糖同鹽; 或者佢都係太年輕喇!

呢個姐姐其實頗粗心大意, 炆餸炆乾, 熨衫熨壞, 係我歷年請嘅工人之首! 佢根本從來未做過傭工, 呢D都係多謝agent嘅欺騙, 話佢好有經驗 :(

是以我真係唔敢將班豬仔交託比佢, 自己走咗去行街街! 

好似我買比豬仔食嘅都係三文魚扒, 都只不過有條大骨喺中間, 每次佢蒸熟咗魚肉, 我會叫佢揀起魚骨, 好等我分配; 但都有好幾次, 我仲會係魚肉裏面挑到魚骨上嚟, 如果唔係我自己照顧幾隻豬嘅飲食, 真係比佢哽死都似!

世上嘅事真係無完美, 如果無工人幫手, 即係要我自己洗衫煮飯, 拖地熨衫, 一諗起要我去做呢D家務, 我就幾唔滿意, 都容忍落嚟!

呢個姐姐, 又唔可以話全無優點嘅, 起碼手腳乾淨, 唔會偷搶拐騙啦, 佢對幾隻豬都唔錯嘅, 佢成日都話最鍾意係同3隻豬仔玩, 同佢哋行街街, 要有溫和對答, 笑容滿面此其時啦!

不過阿姐姐唔明, 我請佢番嚟係分擔家務, 基本上照顧幾隻豬仔, 我都唔駛佢粗勞, 點可能請佢番嚟同幾隻豬仔玩呀!

朋友話既然係唔滿意, 點解唔換過一個? 但真係談何容易!
一來依家請個工人真係好高難度, 有朋友足足等咗9個月,現階段供求掉轉咗, 係佢哋揀僱主, 佢哋要揀工!
而且工人嘅質素, 同以前相比真係差好遠, 我最初請嘅工人每個都有續約, 但近年就真係同佢哋難以構通!

一諗起我教呢個姐姐都教到嘔咗幾桶血, 依家先叫做剛上手, 又嚟過要從新調教, 我就頭都大埋, 而每個工人, 真係無gurantee嘛, 又怕再來一個每況愈下, 就忍得一時得一時啦!

琴晚上咗僱傭論壇, 睇見其他僱主談論佢哋工人嘅惡行, 真係眼都凸晒! 仲有話D中介公司喺度攪攪陣, 會串同D工人姐姐騙佣金!
真係越睇越驚越心淡, 唔通真係要忍,忍, 忍! 

睇下我仲可以忍得幾耐, 忍到幾時啦!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！