一個小實驗

今日波波嘅表現我100%滿意 :)

今日無意中同波波做咗一個小實驗!
傍晚時候我同工人姐姐要出去買D嘢, 又帶埋波波同行, 我想佢見多D人, 就唔會咁緊張啦; 都係出門之前30分鐘, 比佢先滴花藥, 希望藉住花藥幫助, 佢會比較放鬆! 

一路都無出問題, 我手抱住佢, 見到好多人來來往往, 佢都好輕鬆!

回程時番到樓下, 突然記起忘記咗買一樣嘢, 咁姐姐就再跑番轉頭, 我同波波坐喺樓下大堂, 諗住喺度等一陣, 等埋姐姐一齊先返家行!
 

我同波波坐喺樓下嘅梳化,當然大堂係有好多人出出入入; 有跑嚟跑去嘅小朋友, 又有大聲講嘢嘅嬸嬸; 每次呢D比較喧嘩嘅路人經過, 波波都仲係會緊張, 眼仔碌碌咁望到實, 但好安慰佢無開聲吠, 咁我已經好開心; 我無諗過仲可以有另外一個實驗效果, 因為透過玻璃門, 波波可以望到街上, 佢可以望到路過嘅狗狗!

呢個真係一個好嘗試, 我就係咁比波波睇住路過嘅狗狗, 又唔怕果D放繩狗狗衝過嚟; 我真係唔想現階段再嚇親佢, 我諗佢心理上都仲係未ready! 

我小心觀察住波波面部表情嘅變化, 發覺唔到佢有同狗狗面對面嗰種緊張表情! 等到姐姐返嚟, 我真係躍躍欲試, 我好想比波波出去行番一round!

姐姐話外面好好風, 依家唔太熱, 反正我隨身都帶住拖帶, 咁就比波波出去跑一番! 
今日真係行得好開心, 原因係見到波波好穩定嘅心態, 我陪住佢快步咁跑, 等佢可以將壓力

釋放晒!
今日我哋步行其間, 無再遇到其他狗狗, 唔知波波遇到狗狗會有咩反應呢? 算啦我都唔想咁急, 一時間比佢太多挑戰, 見到佢咁開心咁跑呀跑, 我都唔想有任何嘢破壞佢靚靚嘅心情!

帶住一個輕鬆嘅表情 :D

行得好enjoyed, 自由自在!

偶然坐喺呢度, 竟然幫咗我 :)

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！