一場惡夢

走失咗波波豬真係會攞咗我條命!

琴晚發咗個惡夢, 通常夢境一早醒來會忘記得一乾二淨, 但呢個夢不但記得一清二楚, 而且所有情節人物仲栩栩如生!

夢境嘅內容好真實, 好似真係曾經有發生.....

我帶住波波去行一間熟識嘅寵物用品店, 嗰個老闆我識咗好耐架喇, 應該有十幾年; 睇住佢由細店搬到大店, 依家佢間店舖好大, 仲撥出咗個地方set咗個寵物遊樂場, 有好多供寵物玩耍嘅擺設, 例如有寵物隧道, 跳欄等等; 每次到訪我都見到有好多顧客帶同寵物去戲嬉, 好不開心!

嗰日我又帶住波波, 諗住去買D零食同日用品, 到咗店裏, 就放低波波, 等佢可以好free咁走嚟走去, 喺熟識嘅環境, 波波表現得好開心, 亦都可以同其他狗狗相處, 唔會吠人.

 我就如常同老闆吹水, 好多時都有其他顧客加入, 討論養狗心得; 呢度真係一個好地方, 集中咗好多狗友, 有時見得多咗, 都會交上朋友! (真係發夢先可以喺香港有一個咁大嘅地方, 咁好嘅店舖, 咁友善嘅老闆 :)

咁人有人傾, 狗有狗玩, 一直都相安無事! 

當然我自己傾偈, 眼尾都會瞄住波波, 唔好有意外嘛, 見佢同其他狗狗喺度鬥快鑽隧道, 好鬼開心!
呢個時候, 老闆拎咗一本雜誌出嚟, 佢話內容好豐富, 叫我坐低慢慢睇, 咁我就被呢本書所吸引....

到我睇完, 諗住都係時間番屋企喇, 但竟遍尋店裏, 都搵唔到波波!!!
有人話可能有人推門入嚟, 波波走咗出去, 我個心好似無咗心跳, 好似快要暈低; 即刻跑出街去搵, 邊度仲有波波嘅蹤影.....

一路沿住條街係咁跑, 一路口中大聲嗌, 波波你快D番嚟....

真係好可怕嘅一個夢, 醒來滿面眼淚, 個心仲扑扑咁跳!
時常見到有遺失狗狗嘅消息, 我一直都好奇怪, 如果有拖住狗繩, 點會比佢跑咗出街? 我一向都話呢D咁嘅事唔會發生喺我身上, 我一定唔會比我嘅豬仔走丟!
但原來真係會有意外, 你以為喺一個安全環境可以放繩, 但唔代表你可以將雙眼移開, 無論喺任何地方, 只要係無拖住佢哋, 即使係屋企, 都有可能開門嗰時比佢哋走咗出去!

唔知點解會發一個咁嘅夢, 可能係養佢哋比咗我好大壓力, 借住夢境將壓力釋放出嚟; 又可能真係聽聞太多失狗事件, 連發夢都提醒自己要小心!

我個心肝椗波波 :)

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！