 |
| 同3隻豬有種相依為命嘅感覺 :) |
早兩日阿女同老公返咗鄉間一行, 就剩番工人姐姐同我哋, 今日佢哋番嚟喇, 雖然係短短幾日, 都好似好唔習慣添:)
事緣早前無線播放節目"回鄉", 咁就引起咗老公有回鄉之念; 我又唔放心佢一個人番鄉下, 話晒佢無番去都有好多年; 本來應該陪佢同行, 但我又唔放心留低幾隻豬仔, 因為波波早前都行得唔妥, 又擔心工人姐姐唔識餵藥, 又擔心有突發事件!
總之左諗右諗一句講晒, 我係唔放心丟低3隻豬仔啦!
老公又堅持要回鄉, 好想番去睇一睇, 佢仲記得昔日純樸嘅生活, 佢想睇吓今日嘅鄉間有幾多新建設, 舊日嘅風貌又有幾多已變遷!
諗嚟諗去都唯有行番舊路打孖bid, 叫阿女陪佢走一轉, 點都要有個人作伴, 有個照應比較安全!
幸好以前仲有媽媽幫忙睇頭睇尾, 有乜事都可以同工人姐姐有商有量; 自從媽媽過身之後, 一齊出門好似成為絕唱!
我自己唔出門唔係問題, 每行一步都會諗諗3隻豬仔, 鬼叫我既唔放心送佢哋去狗酒店, 又唔相信工人姐姐會攪得掂咩!
好彩我唔熱衷去旅行, 覺得放棄出門都無乜所謂, 實在聽過狗狗住狗酒店出太多意外, 我真係放唔得低!
萬一真係出咗事而失去佢哋, 我真係唔知點算, 我都唔敢想像, 我諗我一定會發晒癲 :)
另一個唔想出門嘅理由, 係今次嘅親身體驗, 波波同豆b都比較黐我, 咁就無發覺有乜問題; 反而達達一向較黐老公, 每日晚餐後都會同爸爸一齊坐喺梳化睇電視, 呢幾日喺預期時間見唔到爸爸, 佢已經顯得好失落, 成日望住門口, 等住爸爸放工番嚟!
就算抱咗佢入房, 佢都要望番出去, 眼定定咁望住個大門口.....
如果老公知道達達咁可憐, 佢一定心痛死!
由咁睇嚟我可以預計, 如果波波見唔到我,一定有過之而無不及; 上次我同阿女去台灣, 佢都一定曾經悶悶不樂,可能老公怕我掛住就唔話比我知!
今次我親眼見到, 達達嗰種失落嘅表情, 我真係唔捨得自己去旅行, 而丟低佢哋....
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
