深宵驚魂

琴晚達達發生咗一段小插曲, 真係又嚇到我有氣無”椗”透!! 

每晚臨瞓前, 我都會比3隻豬仔上我張床, 一齊傾吓偈做個親子活動, 但每次上床前, 都要佢哋去咗尿尿先!

叫爸爸帶達達出去圍欄嘅片片, 我就帶對twins入廁所, 佢哋乖乖咁尿尿完都會獎勵一小塊零食, 跟住就齊齊上床!

爸爸抱番達達入嚟, 話佢屙咗尿尿喇, 咁我就放埋佢上床; 點知隻豬女反應好古怪, 一直喺床上急轉圈!
通常呢個情形係佢想便便, 但時間又唔對, 而且佢一向都唔會喺我床上咁氹氹轉圈！
都係放番佢出去圍欄裏面, 睇吓佢係咪想便便啦! 佢入咗圍欄, 一樣係咁兩頭轉, 轉咗好耐好耐, 無便便亦無停低!

咁我又抱番佢入嚟, 咁轉法真係會虛脫, 再放佢到床上睇吓, 佢究竟會點! 見到佢都係好不安咁兩頭轉, 仲好似有D扯氣, 伸晒脷仔好似呼吸困難!
我開始覺得佢好唔妥, 快快幫佢探熱; 仲記得幾年前有過同樣經驗, 有一晚樂樂又係好似咁樣, 好不安咁兩頭轉！
我當晚都係第一時間幫佢量體溫, 竟然燒到40度, 嚇到我即刻同佢夜診, 跟住通宵同佢抹住腳枕仔降溫!
但達達探熱係溫度正常, 咁又要先冷靜落嚟繼續去諗, 究竟係發生乜事, 令佢係咁兩頭騰!

開始一幕幕去諗.....佢出圍欄尿尿前都好正常嘅! 
爸爸話會唔會係佢比嘅零食哽喉?? 我一聽仲驚, 唔怪得佢好似呼吸困難, 死啦咁點算!!!

爸爸話粒零食咁細, 唔應該會哽頸, 我都試吓推佢胸下嘅位急救, 希望佢會嘔番出嚟; 但努力咗一輪, 都好似無乜幫助, 好彩佢呼吸比之前正常; 咁爸爸話試吓餵少少水等佢吞落去, 可能粒鹿肺太乾, 黐住唔上唔落!

無辦法都要試吓, 佢飲咗一針筒水後, 慢慢咁靜止落嚟, 無再用力咁透氣喇, 可能粒鹿肺之前真係吞唔落, 過咗咁耐又遇水軟化咗, 咁佢吞到落去舒服晒啦; 又可能係佢轉咗咁耐, 轉到索氣, 所以疑似呼吸困難!　　

觀察住隻豬女, 見佢好安靜咁爬低咗, 慢慢咁入睡喇!
一整個晚上, 我都唔敢熟睡, 隔幾個鐘就睇吓隻豬女, 見佢安然無恙, 始放下心!

真係無端端都嚇到我失咗三魂,無咗七魄; 自問我處理零食真係好小心, 每每都會切到好細塊, 但咁都會出事, 意外就係意料之外......

我係養一隻狗, 一隻寵物? 一隻動物? 我嘅感覺同養兒育女真係全無分別, 感情一放深咗, 那怕係一件死物, 都可以觸動你嘅心.

諗起日前睇過嘅短片, 特然好感慨!
一個主人牽住養咗八年嘅金毛尋回犬, 叫人幫佢劏咗作為膳食, 因為狗狗老喇..... 甚至拒絕他人為狗狗贖身!
一個人點解可以冷血至此, 完全天良盡汶! 嗰隻係陪伴自己八年嘅伴侶, 點可能食得入口?? 
真係十人生九品, 如果咁無情感都稱得上係人!



多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！