豬仔5歲生日會 (w/album)

祝三隻豬仔生日快樂, 身體健康!

相片連結

今日同三隻豬仔慶祝佢哋5歲生日, 一年真係過得好快!

呢個係我哋一個大日子, 於佢哋黎講, 會比佢哋食多D唔同嘅嘢; 於我嚟講, 又巴巴閉閉做個大project喇, 於老公同阿女, 就聽命於我嘅指揮啦, 哈哈!

好早前已經開始諗要整乜嘢比佢哋食, 去邊處訂蛋糕.....
今朝一早起身, 就開始整佢哋嘅點心; 我又唔想喺昨晚整好, 咁樣唔新鮮, 不過原來又要切又要焗, 少少嘢都整咗成3個鐘! 我又要親手整喎, 工人姐姐只負責洗用具!

今年喺"狗餅店"訂咗'紫薯乳酪芝士蛋糕"比佢哋, 到咗約定時間, 我自己就飛快咁乘港鐵, 去約定地點拎蛋糕喇, 叫老公快快去買壽包仔, 生日好意頭嘛; 雖然佢哋唔可以真係食晒, 因為呢D係比人食嘅, 但意思意思啦, 撕少少點到即止喇, 願望佢哋平平安安, 身體健康啦!
因為我要控制場面(哈哈!!), 要阿女揸機影相, 佢又約咗人, 唔可以留低好耐, 時間上都頗緊逼架!

好彩餅店影低張相, 唔係就睇唔到我要嘅design喇!

每次都一樣, 無論準備幾充足, 一到正式時間, 都會比班豬仔嘈到失晒魂; 老公又催埋一份, 話佢哋"蛋家雞見水唔得食", 好陰功喎!

咁就攪到我連放張靚靚生日咭影相又唔記得, 正面影清楚蛋糕上佢哋嘅名又唔記得(好彩餅店影低咗!!), 擺咗D裝飾係檯又唔記得放上去, 連點著生日臘燭都唔記得........

一比佢哋開始食仲兵荒馬亂, 完全唔受控制; 豆B未食完自己果兜, 又去食波波果D, 波波又走咗去碟果度猛食, 佢話唔駛分咁麻煩喎; 達達就緊張到死, 一見佢哋經過就鷹晒嘴, 胡胡聲, 攪到七國咁亂, 到最後, 我發覺連video都無影到!!

都唔知點解今年咁混亂嘅, 以前5隻狗狗都無咁難控制, 呢三隻曳豬仔就攪到一塌糊塗!
點都好啦, 忙完一輪, 見佢哋咁欣賞我做嘅點心, 我都係好開心嘅!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！