新床仔 (w/album)

相片連結

我一直諗緊要買乜嘢生日禮物比三隻豬仔, 咁啱見到朋友買咗呢款床仔, 真係幾靚, 咁就托朋友S代購, 真係要多謝佢咁幫手, 我好快就收到喇!

開封前我先將佢哋困入圍欄, 開咗封我就放晒床仔喺地上, 打開圍欄嘅門, 等佢哋自己去揀顏色; 達達第一個衝前, 直線咁衝咗入紅色果張, 波波同豆豆就各自入咗另外兩張, 呢兩隻曳豬仲好快喺入面尿尿, 佢哋係宣示主權卦, 激死我! 

只好快快趕晒佢哋出嚟, 拎去洗咗個墊先啦! 呢隻質料又好快乾喎, 又真係幾好!

晚上阿女見到, 就話我比佢哋自己揀顏色, 放嘅位置有問題; 佢話我放正紅色對住閘門, 咁達達都唔敢行遠, 一定直衝前啦! 

咁我就再放低, 又比佢哋揀過; 雖然我今次將黃色對住閘口, 不過達達都係衝向紅色, 咁即係達達一定要紅色啦, 佢點都唔肯讓比第二個喇!

波波同豆B就好多心, 坐住黃色又望住藍色, 兩隻野兩頭騰!

阿女又話可能達達都想換色架, 不過佢唔敢行出嚟咋, 咁我又鋪張地氈係床仔前面, 睇達達豬會唔會換顏色啦!  點知佢伸個頭仔出嚟望下, 見阿豆望住, 就唔肯出嚟喇, 睇住佢哋真係好有趣, 好好笑嘅; 依D就係佢哋帶比我嘅快樂, 係錢都買唔到架!


比佢哋坐咗一陣, 就摺好想收番起喇, 雖然開住冷氣, 但都係太熱喇; 點知呢幾隻豬好似當係玩具, 達達又爬番上去, 波波同豆豆就跳上跳樂, 玩得不知幾開心, 阿女話由得佢哋玩餐飽啦!

咁好啦, 唔好又再喺度尿尿喇, 衰豬仔!


多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！