狗狗月餅

呢幾隻寶貝豬仔, 令我一而再咁勇於作出新嘗試!

每年嘅九月, 我都好似好忙, 張羅完班豬仔嘅生日會, 跟住又到中秋喇, 又要開始諗同佢哋影過節相喇!

不過今年會忙多一樣嘢, 我將會自己做狗狗月餅比佢哋, 一來可以清楚究竟用乜嘢材料, 二來今年有多咗時間可以去嘗試吓!
不過好多人話傳統月餅比較難掌握, 因為要入爐焗, 餅皮較難控制, 唔係裂開就焗到無晒花紋! 

所以過去兩年我都係訂狗狗月餅比佢哋, 但求大家一齊有少少應節食品啦, 其實呢D純係我個人一廂情願, 對佢哋嚟講, 有得食就ok哪, 係乜嘢形態根本唔重要!


其實我一向都無興趣整餅, 從來都無焗過任何曲奇餅乾, 所以我無信心焗好呢種傳統月餅, 今年等我先試做冰皮, 如果成功, 明年可能有較多信心去作新嘅嘗試!

本來狗狗係唔適合食糯米, 因為黏性強, 佢地腸胃較難消化, 而冰皮嘅材料又包含糯米粉; 有人會覺得比佢地食有害無益; 但我曾經睇過有狗狗食譜, 都有教用糯米同白米拌勻餵狗狗, 咁我諗食少量無防吧!  何況餅皮只薄薄一層, 餵佢地食月餅又只係少少一角, 我諗係無問題嘅, 只要餡料小心選擇就可以喇! 當然啦, 如果餵食過量, 幾有益嘅食物都變成有害啦!

狗狗冰皮月餅嘅做法, 另外post咗喺3豬私家廚房度, 有興趣嘅可以試吓啦!
http://yippompom.blogspot.hk/2011/09/blog-post_1386.html

三隻小可愛!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！