豆b覆診

今日係豆b覆診嘅日子, 佢食咗甲狀腺藥足一個月喇, 係時候睇下情況如何!

其實我一直有觀察住佢食藥後嘅進展, 加上聽醫生建議, 開始添加咗維他命B什比佢, 從佢毛髮嘅進展我都預計到佢情況唔會太壞! 

之前我堅持同佢驗血, 都係睇到佢毛髮薄咗好多, 輕輕撥開就見到皮膚, 依家佢毛毛都生得濃密番晒, 雖然未達到好理想水平, 但我撥開佢嘅毛毛, 就再唔容易見到皮膚喇!

約定時間帶隻豬仔到達診所, 佢開始意識到唔係好事喇, 有D不安!
入到診症室, 二話不說先抽血啦, 因為仲要等報告嘛!
上次佢好叻女, 好乖; 兩筒血好順利抽到嘅, 今次只要抽一筒, 我諗好快就OK啦!

今次佢再唔係傻吓傻吓, 任人擺佈喇; 佢完全知道醫生將要做乜嘢, 佢開始好緊張! 上次喺後腳抽血, 一次過就OK, 今次抽咗少少就抽唔到喇, 無辦法唯有喺手再抽啦, 點知隻豬仔見到枝針插入去, 就開始掙扎同尖叫,  Hsiang醫生即刻拔番枝針出嚟, 姑娘問要唔要抽頸!
我諗Hsiang醫生記得我好抗拒呢樣嘢, 我好心痛嘅; 佢無等我反應, 就話唔好喇!

跟住要先安撫佢! 等咗一陣, 再喺後腳抽過,

我企喺隻豬仔面前一路逗住佢, 總算過咗關!
上次一剎那可以做好嘅嘢, 今次用多咗成30分鐘!

出番去候診室等報告期間, 見到一場小風暴!

其實剛才喺入面, 我都聽到外面好嘈!

有位女士好大聲用粗言穢語大吵, 話呢間診所無醫德, 

話佢隻狗究竟係點無人知, 淨係知驗又死唔驗又死!

我起初真係唔知乜事佢咁激動, 後來聽佢哋對話, 就發覺呢位女士好偏激!

原來作晚佢抱隻BB狗到診, 話小狗有咳, 醫生曾建議作狗瘟測試, 但女士唔肯做, 佢堅持隻B無狗瘟, 叫診所留隻B一晚比佢聞氣就得, 點知留院期間, 隻B抽筋4次, 醫生覺得要確定病因, 因為上呼吸道感染同狗瘟係兩回事, 後者要打血清! 

我清楚聽到呢位女士仍然唔肯做呢個測試, 佢話驗咗知道係狗瘟又點, 都係救唔到, 點解要浪費金錢去驗? 跟住大鬧診所斂財, 無醫德......

呢個時侯醫生叫番我入去, 原來機器故障, 我要再多等40分鐘! 咁無問題啦, 我又唔係咁唔講理嘅, 大家都唔想浪費時間嘛!

我係診症室入面仲聽到呢位女士大吵,  好似要話比我哋呢D候診者知, 叫人唔好嚟睇症咁! 雖然果個case上次唔係由Hsiang醫生應診嘅, 但佢見到有人喺診所搗亂, 佢好唔開心, 佢出去解釋話唔驗就無比狗狗一個機會, 無人會知發生緊乜嘢事!

 呢位女士要確保如果花錢驗出嚟, 報告係狗瘟, 要一定可以醫好狗狗, 咁佢就無白花化驗呢筆錢, 如果到頭來都係救唔到, 咁佢唔會做!

試問邊個可以作出呢種保証?

Hsiang醫生三番四次想再出去解釋, 我同其他姑娘都勸止, 根本要講嘅都講咗!

我提議比狗狗佢帶走啦, 咁留低都無辦法嘛,  如果呢位女士已經唔信任醫生, 比佢帶狗狗去另一間診所, 都可能比狗狗一條生路!
Hsiang醫生叫姑娘快快比番狗狗佢, 留院費, 聞氣費都唔收喇!
佢但求快快解決麻煩!

有時真係好無奈嘅, 當一個人有咗偏見, 咁就有理說不清喇;

要信任你嘅, 自然喺任何情況下都唔會動搖對你嘅信任!
要唔信你嘅, 佢會喺自己腦入面種根, 咁任憑你點解釋都無用!

有人同我講過, 只同信任你嘅人做朋友, 咁會開心好多, 因為佢認識你, 相信聽到有關你唔好嘅, 係謠言; 相反對你太多猜疑, 又自編自導劇情, 呢種人都係同佢講'再見'啦!

擾攘咗一輪, 我都留低近兩個鐘喇, 豆b嘅報告出嚟喇!
佢血糖係正常中嘅最低點, 但因為今次佢係空腹驗血, 可以接受!
甲狀腺素食藥後, 回升至正常水平, 心跳同呼吸都正常番喇,  感恩!!!

唯一發覺佢後腳關節比較弱, 要小心保養, 不過Hsiang醫生話我keep住佢體重係1.6kg已經好好喇!

只要唔過重, 唔好跳上跳落, 咁唔會好快惡化嘅,

因為佢咁細嘅腳骨, 係無可能有手術幫到架,

咁我會加倍小心啦!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！