近兩日集中研究用乜嘢食材餵狗狗係最好嘅!
每個人都知道新鮮食物當然係最好, 所以優質嘅狗糧都標榜用人類食用級天然材料去做, 咁點解我哋自己唔用新鮮材料, 直接炮制食物比自己嘅寶貝呢? 又點解仲有咁多不同品牌嘅商業糧產生?
原來真係有好多因素, 在我嚟講, 要計算一份營養均衡嘅餐單真係唔容易, 蛋白質, 礦物質, 鈣質.....一大堆營養嘅配合, 真係睇到頭都大埋, 所以我遲遲唔敢放棄餵乾糧, 而寧願選擇一星期餵兩,三餐自制食材!
其實講真, 咁做對佢哋健康上幫助唔大, 唯一好處係佢哋食物有D變化, 同埋就算唔識計條營養程式, 都唔會影晌好大, 因為主力都係餵狗糧嘛!
另外, 喺經濟上差別都頗大, 保守估計使費都相差3,4倍! 再者就真係無咁方便; 幾忙嘅人都做得到從糧袋倒D乾糧出嚟餵狗狗, 但homemade嘛, 最簡單都要洗凈件肉蒸熟, 再配合蔬菜吧!
自從同網友ka交流過佢喺呢方面嘅經驗, 佢幫狗狗搵到一個折衷方法, 既可餵食新鮮肉肉, 蔬菜, 又可做到營養均衡, 得到良好效果, 的確加強咗我都想嘗試呢個改變!
不過越搵得多資料, 越攪到我好混亂, 個腦轉過好多唔同嘅方案, 我好怕有嘢做錯!
其實影嚮我好大嘅主要因素, 係波波之前因為飲食唔均衡引起佢bun指素超標, 我好唔容易先調較到佢去番正常水平, 真係有少少唔敢輕舉莽動!
但回心細想, 我可以做到佢身體無恙, 點解唔可以做到更好, 等三隻豬仔更健康? 我唔可以怕煩, 就唔去嘗試比佢哋得到更好嘅膳食嘛!
希望我會成功將佢哋養得健健康康, 雖然有時都要睇個別狗狗嘅吸收程度, 佢哋會唔會唔適應等, 但起碼我有為佢哋踏出過呢一步, 如果失敗, 都叫做甘心!
就由今日開始, 比波波豬試吓先啦!
