闖開心理關口

剪毛四日後達達豬敢主動行出圍欄外企一陣!

達達豬嘅情緒病, 雖然係好番好多, 但仍然係有問題嘅! 有時都唔知發生乜事, 佢就會特然大聲尖叫; 我地一直嘅做法都係慢慢哄佢, 唔想嚇親佢, 怕咗佢會越嚟越嚴重!

真係唔知到底係乜嘢問題引至, 佢會咁神經質, 咁無安全感; 佢喺圍欄入面行動敏捷, 可以飛快咁跑隧道, 一切完全正常; 但一離開圍欄, 佢就連行一步都有問題! 

起初我哋以為佢怕地下跣, 驚跌親所以唔敢行到圍欄外, 我哋就鋪張地氈比佢, 起初佢都係行得唔好, 到佢熟識咗張地氈, 咁又無問題喇, 但如果我哋換咗另一張氈, 佢又係唔肯行出嚟! 咁即係主要都係佢心理有問題!

果日C哥哥嚟同佢哋剪毛, 我就一早交代咗達達嘅情況, 佢係會無端端尖叫嘅! 

不過可能在佢嚟講都唔係無端端嘅, 但係乜嘢原因我哋唔知囉!

C哥哥就覺得我哋嘅做法係唔啱嘅, 好似一碰達達佢就尖叫, 而自己又確定無傷害到佢, 咁就唔好放手, 由得佢叫, 要比佢知道叫係無用, 佢應該要學習適應!

我哋以前抱佢, 佢一尖叫我哋就立刻放低佢, 怕佢唔開心, 唔想勉強佢!

果日剪毛成個過程我都睇住(唔睇住聽到D尖叫聲, 我會以為C哥哥係度劏狗仔囉, 哈哈!) 達達豬又大聲尖叫, 喺度大力掙扎, 我見到C哥哥係無放開手, 佢一直捉實達達, 任得佢發晒癲咁喺度典, 過咗一陣, 佢就停咗無叫喇, 咁C哥哥就開始同佢剪毛!

喺成個剪毛過程中, 達達都有幾次無端端尖叫嘅, 我見哥哥會放低晒D較剪, 因為怕傷到佢, 但就無放開捉住達達嘅手, 佢一路都堅持比達達知道, 尖叫反抗係無用嘅!
咁達達叫完一輪, 又真係會乖乖哋企係度比哥哥剪落去喎!

我睇住哥哥剪毛, 真係上咗一課, 唔係學到美容技巧, 係學識要堅持!

堅持去糾正達達行為, 情緒上嘅誤差! 我哋一貫嘅做法係太錫佢, 乜都怕嚇驚佢, 唔想勉強做一D佢唔鍾意嘅野; 其實咁唔係幫佢, 係陪住佢行一條錯嘅路, 我哋要做嘅, 應該係引領佢行番入正途!

過去我唔係無試過幫佢咁做, 但最後都係自己唔夠堅持, 心痛佢離唔開個欄, 又鋪番地氈比佢!

喺果日之後, 我將地氈收起, 要達達豬從新學習離開圍欄行路!
當然我無強逼佢, 我怕物極必反; 但我會係圍欄外用D小食誘導佢試吓行出嚟! 佢有時會想嘗試, 有時更會掉頭走!

剪毛當日見外面無咗地氈, 只敢前腳踏出外面!

現階段係未見到成果, 佢都未敢離開圍欄行走, 但經過咗一星期, 佢有時會敢企出圍欄門外, 甚至向前行兩步喇!
佢以前係唔敢主動用四隻腳仔離開個圍欄架, 最多都係前腳踏出嚟, 後腳點都唔離開個欄架!

我相信要佢衝破呢個心理關口好難, 要好長時間! 

一個月唔得, 就一年, 兩年囉!! 佢咁細個, 仲有成十年嘅路要行, 就算花上兩年去適應, 佢都仲有好多年可以開開心心咁跑吓, 唔係的話, 佢嘅一生就比自己禁錮係圍欄內喇!!

我要叫老公配合我, 通常都係佢壞我大事嘅, 當我見到達達想行前又退後, 前前後後好多次我就會有所動搖, 點知佢仲心痛過我, 快快咁又為佢鋪番張地氈!

今次, 我一定唔會心軟, 亦一定唔比老公咁做, 我一定要堅持, 堅持落去呀!!!!!
我日日都好似催眠咁同自己講, 我都係為咗佢好, 唔係虐待緊佢呀!

睇嚟我同達達豬都一樣, 都有一個心理關口要過, 佢要刻服離開個圍欄行走, 我就要刻服衰心軟!

我唔可以愛佢變成害佢架, 加油呀!!!!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！