補充天然鈣 - 蛋殼粉Egg Shell Powder

波波經過咗差不多兩星期逐步轉糧, 依家已經完全食用自煮熟肉加脫水菜糧喇;  而兩隻豬女都開始咗逐步轉糧呢個程序, 希望佢哋會適應, 並且身體越嚟越好啦!

以前食乾糧, 就無需要考慮點先可以均衡營養, 但依家改變咗佢哋嘅膳食, 就要考慮一D補充品喇!

雖然脫水菜糧已經有足夠維他命同礦物質, 亦有添加咗鈣, 但咁並唔足夠, 糧中嘅鈣都只係足夠去跟其他蔬菜中嘅礦物質做一個平衡,  所以官方網都提議必須要食生骨去補充鈣質!

我對生嘅嘢好有保留, 唔係好想試; 咁可以買樽鈣粉, 再唔係有一個更好嘅選擇, 就係利用蛋殼喇!
每一個蛋殼的成份包含 碳酸鈣（94％）,碳酸鎂（1％）,磷酸三鈣（1％）, 有機物​​（4％）.

利用蛋殼去制作蛋殼粉簡單容易, 蛋殼粉係天然鈣, 唔駛擔心會積聚係身體內, 無食用過量嘅危險,  咁就唔怕影嚮狗狗骨質, 關節嘅健康啦; 而且廢物利用, 一舉兩得!

如果想做蛋殼粉, 可參考以下方法, 真係快捷, 方便又實際!

將蛋殼洗淨風乾 , 然後放入焗爐中以150度焗10分鐘,  攤凉後放入攪拌機磨成粉備用.

一般10kg嘅狗狗, 食脫水菜糧加肉, 應該每日加1/5 至 1/4 茶匙, 如果食新鮮嘅蔬菜,  要加1/2茶匙先足夠.

如果係大型狗狗, 可以儲多幾隻蛋殼先做, 我嘅係小型狗狗, 用量好少, 所以一, 兩隻就做喇; 因為無防腐劑果類嘢, 唔想用太耐,  實行每兩星期做一次, 用唔晒都唔要喇, 再做過新鮮嘅; 做好咗我就放入雪櫃內, 咁就唔怕有細菌啦!

 

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！

聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。  望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！