天才與白痴

阿女同我開呢個blog嘅時候, 曾笑問估計我要幾耐寫到100篇blog文, 唔經唔覺, 呢篇剛好係第100篇喇, 唔包括其他分類, 純計算我寫我嘅寶貝, 3個月時間算唔算高產量呢?
無諗過自己會有咁多嘢寫, 可能我都算係一個鍾意講嘢嘅人啦, 哈哈!

人與人之間交往, 除咗基本體諒, 好多時都有一D不明因素; 唔知點解有D人, 你莫明其妙咁唔想同佢交朋友, 好似有第六感, 覺得會麻煩多多, 呢D係俗語講嘅唔夾;  原來狗狗都有咁嘅感覺!


我呢個工人姐姐嚟咗幫我都有10個月喇, 睇嚟尚算純品, 老實! 但唔知點解, 兩隻豬仔都唔鍾意佢嘅, 尤其係波波, 每次佢踏入我房, 我都覺得隻豬仔繃緊晒在戒備狀態, 可能波波認為房間係私人地方卦, 即使佢入嚟拎個廢紙籮去倒, 波波都會吠佢, 總覺得佢要搶我哋嘅嘢咁!

因為咁樣, 我有同佢講過, 入嚟我房前要敲敲門, 我有需要睇緊D隻豬仔! 通常我喺房嘅時候, 波波都會喺我床上咬佢心愛嘅鹿筋! 因為我感覺到波波唔鍾意佢, 所以我叫佢入嚟前要比我準備,  我唔想隻豬過激跳出嚟跌親!

呢個姐姐開頭都有聽我吩咐, 漸漸就失憶喇! 早兩日入咗嚟我都唔知, 最終就發生咗我最唔想發生嘅事!

當時我背住佢哋睇緊個腦, 特然聽到佢驚呼'哎吔, 波波', 擰轉頭就見到波波從床上跌緊落地, 我伸手接都接唔住!

最令我嬲到爆嘅係, 佢企喺旁邊完全無嘗試捉住個仔, 任由波波喺佢身邊直跌落嚟!

佢話見到波波瞓咗, 想同佢拎開條鹿筋! 真係好做唔做, 做埋D多餘嘢!
好彩檢查過波波無事, 但都嚇到我標晒冷汗, 驚咗一輪先識嬲, 真係嬲到震!

其實狗狗反應好直接嘅, 我會懷疑係以前我番咗工發生過某D事, 令到波波咁反感; 而另一個解釋原因, 就係佢哋唔夾!
我用過幾個工人, 無一個會有咁情況嘅! 通常都係初到果幾日狗狗未認識佢會吠, 之後明白到佢都住喺我哋屋企就會習慣唔再吠喇, 從來未有過為時10個月, 狗狗都咁抗拒嘅情況!

但睇起嚟佢又唔似壞人, 見過佢嘅人都話佢純品, 唔通佢做戲咁叻, 咁深沉? 可以騙到咁多人?? (不過我見過佢擺面色比樓下D管理員睇, 仲同我講話每次佢單獨出入, 人哋唔同佢拉門! 真係奇怪, 人哋又唔係門僮, 好多時都係見我推住架車仔, 先同我拉門, 我都鬼咁唔好意思, 唔該前唔該後啦!)

不過, 諗落佢都真係好聰明, 因為佢承認自己蠢, 所以我哋會覺得佢能力不隸係正常嘅, 就唔會對佢有要求, 做得好係驚喜, 做唔好係意料之內,  可能波波豬感覺到呢D都唔定!



多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！