雖然睇住達達豬D毛毛又差咗, 但又無上次咁不安喎!
唔知係自己放鬆咗, 還是係覺得佢將會換過一D靚毛毛呢? 依家佢嘅毛毛唔單只係旱, 仲會斷, 質地就好似一團團羊毛, 無晒光澤, 當然咁唔係正常嘅現像啦! 但我有期待, 有希望佢會好轉!
呢個咁有信心嘅期待, 大部份原因都係嚟自波波!
從佢轉咗糧開始, 我睇住佢越嚟越多好嘅改變!
為咗佢不停咁抓耳, 又成日甩頭, 甚至個頭仔都歪埋, 我都唔知有幾困擾; 同佢睇過唔只一次醫生, 甚至依家每次定期驗血, 我都一定請醫生同佢檢查耳朵, 但每次嘅答案都係無事!
但無事點解佢又會頻頻做以上嘅動作呢?
唔知係隻洗耳水嘅效果, 還是係改變咗食糧嘅關係, 但我偏向相信係轉糧效果!
除咗呢個改變, 仲有就係佢嘅毛毛喇!
波波毛毛一向都唔算豐滿, 而且偏向無力, 太幼太軟, 做唔到一個波波松鼠嘅效果, 但佢改變咗膳食嘅一個月後, 我發覺佢嘅毛毛挺咗, 光亮咗, 毛色都靚咗!
每次見佢走嚟走去嘅時候, 我都會不自覺笑起上嚟, 因為真係睇到佢每一方面都進步緊!
雖然之前都有睇到ka狗狗明顯嘅改變, 但從相中睇人哋嘅狗狗, 同真實咁感受自己狗狗每日嘅進步, 感覺真係分別好大!
不過佢眼仔都未見到有明顯進展, 仲係會矇矇眼同好多淚水, 如果呢樣都有改善, 咁就完美喇:)
可能有波波比我一個咁正面嘅訊息, 我對達達都有信心咗, 即使今次佢又再度甩毛, 我都相信佢會換過D靚靚毛毛嘅, 再比多D時間佢啦!
 |
| 有代改善嘅矇矇眼波波同羊毛氈狀披毛嘅達達! |
 |
| 好大風呀! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
