波波轉食脫水菜加肉, 由開始每日一餐, 跟住兩餐, 到全轉三餐, 前後都有三星期喇, 最明顯見到嘅改變 ,竟來自佢嘅便便; 依家佢嘅排便量只得往時嘅一半, 仲明顯無咗難聞嘅氣味, 呢D應該係好嘅轉變吧!
不過我覺得佢嘅便便較乾, 同顏色較深, 請教過網友K, 佢餵菜加肉比狗狗已經有頗長嘅一段日子喇; 佢話顏色深咗屬正常, 如果有加飯就會較淺色嘅, 叫我加少量油份, 同要加蛋殼粉!
其實我一開始轉肉已經讀熟資料, 所以我有加上述兩樣嘢架, 不過可能加嘅份量不足啦, 因為剛起步, 總係會小心D, 從少量開始, 咁我再調較一下, 加多少少比佢啦!
不過無壞嘅開始, 就係成功嘅一半, 而且我發覺到佢嘅毛毛比以前濃密, 亦較有光澤, 佢兩腿間皮膚嘅黑色素亦淡化咗, 呢個膳食改變, 似乎對佢係適合嘅! 希望再落去見到越嚟越多好嘅改變啦!
達達豬仔嘅起步點就遲過波波, 佢依家仲係一日兩餐嘅階段, 本來我唔想咁快開始同佢轉糧, 想睇下波波嘅反應先, 不過見佢毛毛開始乾旱, 又見波波無出負面問題, 咁就急急同佢開始喇; 暫時無見到有乜嘢改變喺佢身上, 不過只要無差咗, 咁我就有信心繼續落去!
睇資料話部份狗狗轉咗食肉糧後, 體重可能會減輕, 因為會消耗咗一D脂肪, 但一段日子後會轉化為肌肉, 咁就會回復番正常, 只要加減唔超過10%, 就係正常嘅!
今日同兩隻豬仔磅重, 達達體重無改變, 波波就重咗1.5%, 咁即係佢哋非常適應呢個改變, 而且有好嘅改進添, 真係不枉我為佢哋做多咗咁多野, HORRAY!!
