波波轉糧後無見到有壞嘅影嚮, 兩隻女食咗幾餐都無乜特別問題, 檢查過佢地便便都幾好, 無消化唔到果種蔬菜, 算係好嘅開始; 可能依家日子尚短, 未見到有好明顯嘅變化啦, 我真係好期望佢地有好嘅改善!
達達毛質真係差咗, 以前H醫生都話天氣轉涼佢甩毛情況有機會復發, 見到佢毛質咁旱, 都唔知點算, 又開始擔心!
波波近排又成日矇矇眼, 好彩佢都無捽, 可能有D敏感啦!
豆B嘅氣管早上開始有D怪聲喇, 呢隻豬氣管弱D, 我希望佢哋食咗homemade後身體強壯D, 唔好再咁多毛病喇!
轉糧後, 隨之而來要考慮嘅, 就係保健產品, 以往食開嘅有無必要改變?
轉食熟肉加脫水菜, 都係想狗狗食得天然, 如果可以嘅, 當然唔想再添加太多其他補吸品, 但都要睇番自己狗狗嘅健康狀況!
波波, 達達同豆豆, 都有甲狀腺素不足症, 佢哋一世要補充藥物, 已經係不可逆轉嘅事實; 由於係咁, 佢哋皮膚都較乾, 醫生都建議佢哋食魚油同維他命B雜, 呢兩樣我會繼續比佢哋食, 此外, 食緊嘅保迪牙粉都會繼續, 姑勿論對於去除牙石係咪有幫助, 但內含嘅海藻類對佢哋都有補碘嘅幫助, 再者，我會再加多一樣, 就係酵素!
酵素係所有動、植物體內都有嘅物質。佢係由蛋白質所構成, 身體需要佢嚟維持正常功能、消化食物、修復組織等。目前已知嘅酵素有數千種。事實上 ，即使有足量嘅維他命、礦物質、水分同蛋白質，如果無咗酵素 ，仍然無法維持生命。
每一種酵素喺身體內都有特定嘅功能，細胞大部分嘅反應都受呢種必要嘅蛋白質啟動 ，但要注意唔好比佢哋負擔過重。例如，假如身體必須製做足量嘅酵素去消化時, 咁製做正常新陳代謝所需嘅酵素就可能唔夠!
比狗狗服用嘅酵素必須為植物性酵素(plant based enzyme), 如果想為狗狗添加呢樣保健品, 請小心選擇纯酵素配方; 如果狗狗有食便便嘅習慣, 消化食物有問題, 都會有一定嘅幫助 。
 |
| 帶小朋友去遊樂場, 哈哈! 多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！ |
