 |
| 仲係笑容滿面嘅達達, 要keep住呢股正能量啊! |
導師解釋[靈氣灌項]係氣功嘅一種, 同中國氣功類似,靈氣治療係用大自然靈氣去調節身心和提升主人對動物治療同溝通能力及信心!
今晚導師有幫我哋嘅狗狗試做遙控嘅reiki animal healing, 又利用一個水晶狀物體(死喇, 咁快唔記得果個叫乜東東), 去測試下我哋狗狗嘅狀況, 不過每人只可以測試一隻寶貝, 仲有睇咗已過身嘅寶貝氣場依家點樣!
我當然係最想知, 達達依家嘅身體同精神狀態係點啦, 導師話所有嘢都係一環接一環, 達達個磁場係唔太好, 但唔係純後天影嚮, 根本佢先天身體都有問題, 再加上後天又唔識幫佢釋放負能量, 咁就壞上加壞!
佢話搵唔搵到乜嘢原因導致達達有恐懼感係無意義, 亦唔重要; 最主要係可以搵到方法幫達達! 我絕對認同, 但談何容易!!!
老實講上咗呢堂, 真係學唔到D乜嘢, 不過做打坐嘅時候, 又好似真係感覺到有熱有光, 都唔知係咪自己嘅幻想; 但又唔係全無得著嘅, 起碼我都相信每個人都有一股能量, 如果想幫狗狗, 自己先要學識釋放, 唔好比咗負面訊息狗狗, 即係我本身性格樣樣都咁緊張, 其實就間接都比咗負能量達達!
呢一課我反而另有領悟, 凡事平常心, 詳和D面對啦, 要嚟嘅始終逃不過, 要走都留不住, 自己有壓力都帶比身邊人同狗狗有壓力, 希望我有改善啦! (其實我唔係唔知, 不過要改變性格又唔係咁容易囉, 盡量提醒自己啦:D )
與其話係靈氣治療, 其實都花咗好多時間, 著墨喺誘導我哋組織一個正面嘅態度!
點都好啦, 明日試吓靜心打坐, 先嚟試10分鐘, 希望自己情緒都唔好繃得咁緊, 心境可以平和D, 咁就可以有正能量去幫達達豬啦!
仲有導師叫我哋對小朋友唔可以偏心, 不過我哋都覺得不知不覺間, 都係有分別嘅, 大部份人都有或多或少嘅偏心啦, 總會有同自己特別貼心嘅寶貝嘛; 但佢都講得啱嘅, 狗狗係有感覺唔開心嘅, 即使佢被逼接受, 淪為阿二, 阿三, 但唔代表佢唔希望得到同等嘅愛! 大部份人會係咁 ,唔代表係對嘅!!
要一視同仁真係好難呀, 但盡量試下啦, 養一隻又怕佢悶, 養多隻又怕佢妒忌, 分薄咗佢嘅愛, 真係做人父毋甚艱難呀!
P.S. (3日後)記起喇! 記起喇! 導師拎住果個水晶係靈擺, 同我哋test我哋寶貝嘅七輪, 而達達豬前五輪都係唔好嘅, 得最後兩輪稍為好D, yeah!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
