 |
| 無人會相信達達豬有任何異常! |
今日, 同達達主診醫生通過電話, 談及達達毛毛又出事嘅問題, H醫生建議循序漸進咁增加番褪黑激素嘅份量!
其實H醫生以前有同我提及過, 到咗天氣轉涼嘅時候, 達達係有機會復發嘅, 所以佢叫我即使達達生毛情況理想, 都唔好停服褪黑激素, 而係將劑量降到最低, 等佢身體有一條伏線, 萬一佢再番發嘅時候, 希望有多一個機會, 起到一個治療嘅效果, 雖然係無保証, 但總好過眼瞪瞪睇住佢惡化落去 ; 佢話呢隻屬一隻草本激素, 對佢身體係唔會有傷害嘅, 如果完全退出呢隻藥, 咁再度服用都唔會有效用喇! 我有聽取佢嘅建議, 當達達長毛旺盛嘅時候, 我有比佢每星期服用以前一日嘅藥份!
我係一直都有心理準備呢一日會再嚟, 達達身體有咁嘅因子, 根本避無可避; 只不過無諗到咁快!
從網上搵到嘅資料, 呢個病一般發病都係11月至3月呢段期間, 咁又真係好吻合達達嘅情況, 從去年10月左右我發覺佢披毛變異, 咁就開始掉毛. 一直到4月佢毛囊就開始復甦, 6月到8月期間生長最茂盛, 9月開始我就發覺佢毛質開始乾旱, 到依家都好似跟住呢個模式去改變!
如果每年佢都要經歷呢個循環週期, 都真係無可奈何! 只不過, 每隻狗狗身體情況唔同, 有幸運嘅幾年後復發, 之後又可以生長番毛毛; 又有如我叻叻, 兩年後先復發, 但就一直掉光, 亦有每年循環呢個階段, 掉了又生, 再掉再生!
我唔知達達會係演繹邊個模式, 根本知道亦都做唔到乜嘢, 我只可以調理好佢嘅身體, 例如轉食homemade, 等佢可以吸收一D優質嘅蛋白質, 儲備充足嘅彈藥去打仗, 呢D就係我唯一可以為佢去做嘅喇!
如果不幸佢好似叻叻一樣, 今次會直掉光佢嘅毛毛, 我都希望佢有一個健康嘅身體, 更希望佢唔會為咗咁唔開心, 如果事實係無得改變, 幾唔願意都唯有去接受啦!
 |
| 只有我最清楚我哋又要準備迎戰! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
