實行咗比豬仔們轉食熟肉+ 菜糧, 就開始要搵source買肉喇, 雖然係買凍肉, 都希望可以買到D比較乾淨企理嘅; 最怕一D凍肉店放晒喺門口, 任由D肉溶晒雪, 真係唔知有幾多細菌滋生, 我點敢買比佢哋食丫, 攪到腸胃炎咁就死得啦!
真係寧願自己病好過, 睇醫生又貴過人, 仲要唔識講有乜唔舒服, 真係唔到你唔格外小心!
當然選擇喺D大型超市或百貨公司嘅凍肉部選購, 質量就有信心好多, 但價錢相對嚟講又比較貴, 日日咁餵都真係要做個精明嘅家庭主婦, 要格下價至得!
好彩記起網友K有訂開貨嘅凍肉公司, 佢話質素唔錯, 價錢亦合理, 多謝佢比資料我; 清理好冰箱, 謄出空位我先敢訂番嚟!
今日收到貨喇, 質量唔錯, 可惜今次鴕鳥扒缺貨, 羊髀肉比較肥, 切左D脂肪後得番60%肉, 牛冧最靚,感覺好新鮮!有咁多種類選擇, 可以比佢哋常常轉吓口味喇!
我今次訂咗有: 三文魚扒, 去骨羊髀肉, 紐西蘭鮮牛冧,免治牛肉,龍利魚柳, 立魚柳, 鴨胸同埋雞柳等; 日常除咗以上肉類, 仲要再另加雞蛋, 豆腐同鮮雞肝, 都夠兩隻豬仔食足一個月有多架喇!
同工人姐姐快手快腳又切, 又磅, 分開每日份量, 再包好; 咁唔駛怕拎出拎入溶晒雪, 就衛生好多啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
