今日同兩隻豬仔洗白白!
突然諗起以前同其他狗狗沖涼嘅日子: 再早期果D印像比較糢蝴, 但唔會忘記同叻叻沖涼發生過一個小意外, 因為當時佢已經無晒毛毛, 我用風筒同佢乾身嘅時候, 無將風筒移得遠D, 竟然傷到佢皮膚, 令佢有個小水泡, 當時我真係心痛到死, 怨自己咁大意!
再後來, 屋企同時有五隻狗狗, 每次同佢哋沖涼, 都要彎住條腰好長時間, 跟住嚟嘅當然係腰酸背痛, 條腰都好似要斷開一樣; 相比起依家, 當然輕鬆好多, 但我竟然好懷念以前巴巴閉閉果種日子!
同五隻豬仔沖涼, 都要經過適心去安排次序!
佢哋當中, 精精係最乖嘅, 佢好享受同佢沖涼嘅每個過程, 好懂事咁配合我, 同佢沖涼一D都唔辛苦, 所以佢永遠都係排第一嘅; 因為同其他幾隻沖涼都好似打仗咁, 我怕再無精力, 亦無勇氣繼續落去!
跟住會係安安喇, 雖然安安體型比其他幾隻為大, 但佢就最細膽嘅, 佢好怕個花洒, 左閃右避, 仲想跳走! 我根本唔可以放開手, 因為佢滿身梘泡, 好怕佢會跣親; 試過用一大盆水同佢洗, 諗住最後先用花洒過清, 但放佢落水佢又驚到好似遇搦咁, 亂打亂撥, 攪到我成身濕晒; 通常同佢搏鬥完, 都無咗半條人命!
第三隻就會係達達豬喇, 達達豬都係一隻乖豬仔, 佢都唔會好抗拒清潔嘅每個程序, 不過佢就好憎吹乾毛毛嘅, 因為佢唔鍾意聽到風機發出嘅聲音, 即使屋企吸塵, 佢都會嘈嘈閉!
不過佢細細隻, 我唔駛好似控制安安咁辛苦, 排佢第三當係比自己一個透氣嘅機會!
第四位係波波豬, 佢無達達咁淡定, 雖然唔算合作, 但亦唔係太難操控, 不過去到呢個階段, 自己都開始感覺吃力, 還好佢唔怕吹毛, 不過一定要抱住嚟吹, 唔可以放低佢!
第五位小姐樂樂, 好多時去到呢度我都想放棄繼續落去, 因為佢好難服侍! 無論我幫佢沖水, 洗耳, 梳毛....佢都會發脾氣; 佢會跳起嚟咬個花洒, 亦會擰轉頭咬我捉住佢嘅手, 最慘係又唔可以放開佢, 跌親佢仲慘過比佢咬嘛! 同呢位小姐沖涼, 每分鐘都好似打仗, 要唔停口哄佢, NO佢, 完成整個過程後, 真係兩敗區傷, 大家都累死咗!
今日同佢哋沖涼, 好快就完成整個過程, 我亦一D都唔累!
但我突然好掛念叻叻, 安安, 精精, 同隻惡女樂樂! 唔知佢哋依家點呢?
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
 |
| 兩隻豬仔沖完涼都好似心情唔錯! |
