同命鴛鴦

真係同命鴛鴦, 一齊甲低, 一齊關節移位, 仲要同係左後腳!

又到咗豬仔們驗血嘅日子喇, 喺約定時間, 準時到達診所! 一開始佢哋見我拎個袋出嚟, 仲開心到爭住跳入去, 諗唔到個目的地會係呢度, 佢哋一定好後悔入咗個袋喇, 哈哈!

今日佢哋除咗驗甲狀腺素, 仲同達達豬做埋個血常規檢查, 咁快又過咗一年喇!
佢哋都5歲喇, 又有甲低, 我諗都係同佢哋年年驗身, 令我放心啦!

因為波波單一驗甲狀腺素, 只抽一筒血, 我同佢先入去; 一如佢嘅性格, 佢一入去就驚到成身震晒, 少少一筒血都要分兩次抽, 因為佢猛力掙扎, 成日同姑娘姐姐鬥力, 係都要抽番隻手出嚟!
無法啦, 唔合作就唯有痛痛啦, 要吉多一針囉!

抽完血就做body check喇, H醫生一向都好細心, 由頭check到落尾, 聽心肺, 無事, 檢查耳仔, 眼底, 皮膚, 淋巴, 體溫都無事, 跟住就到檢查松松最常見嘅膝關節有無移位喇, 唉! 隻豬仔有輕度屬1級移位, H醫生話唔好比佢跳, 好好保養應該問題唔嚴重, 去到4級就要做手術架!

但佢係波波豬, 由細到大都彈彈跳, 亦因此改佢個名做波波嘛, 點叫佢唔跳丫?! 檢查完抱番佢出去等報告, 就輪到達達豬入去喇!

H醫生一見隻妹豬, 就唔停口話佢好靚, 好甜, 成個毛毛球, 仲情不自禁咁想錫錫; 隻妹豬一入去已經知勢色唔對啦, 大聲尖叫仲想咬醫生個鼻, 好彩醫生縮得快, 呢隻辣椒仔!

佢都係性格鮮明, 要同佢抽血真係唔容易, 佢不停咁典嚟典去, 抱都抱唔實, 仲要擘大喉嚨大叫, 結果我要幫埋手同姑娘姐姐一齊捉住佢手腳, 不過枝針一吉落去佢就唔郁喇, 結果兩筒血抽咗3次, 叻過波波喇!

隻豬女真係太激動喇, 抽完血都唔停口鬧醫生, 結果個針口按咗好耐都唔止血, 要出動彈性繃帶紮住, 跟住要同佢出去冷靜吓, 一陣先再入去檢查!
兩隻豬好似掉轉性格, 隻仔性格柔弱, 隻女就剛烈非常!

坐咗一陣, 報告都出咗喇, 醫生叫番入去; 兩隻豬甲低都控制得好好, H醫生話跟番相同份量繼續食藥無問題喇!

因為達達都食咗homemade肉足一個月, 我好想睇下血常規有無問題; 結果報告好靚, 血色素都好好; 至於佢毛毛問題, 醫生話未係太壞, 唔好增加褪黑激素份量, 如果佢真係有進一步惡化落去先加藥啦, 跟住就開始身體檢查!

豬女同波波一樣, 一切良好, 唯獨膝關節仲差過波波, 佢係介乎1-2級移位喇, 不過佢唔會跳, 希望唔會惡化啦! 我有問醫生想幫佢哋補充葡萄糖胺, 但醫生話佢哋係膝較移位, 唔係軟骨磨蝕, 對佢哋無幫助, 唔駛食喇!

今日檢查, 大至都唔錯喇, 關節移位呢D, 係呢個犬種特有嘅毛病, 我都唔意外啦, 希望佢哋乖乖地唔好跳跳紮, 可以唔再惡化就感恩喇!

今日抽血, 兩隻豬仔都激烈掙扎, 手仔腫咗, 今日暫停散步, 坐車遊花園算喇!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！