 |
| 一直無精打采, 直至見到其他狗狗, 即刻精神晒! |
今日係星期日, 正常都會遇到多D狗狗嘅, 希望波波可以見多D同類, 習慣下同狗哋相處, 唔好見親其他狗狗都吠啦! 今日早咗出去, 諗住行一陣先番嚟餵佢哋午餐!
波波呢個少爺仔真係難捉摸, 佢知道去街街表現好開心嘅, 但落咗樓就表現唔同晒, 行兩步停一停, 再唔係就坐低; 同佢哋散步我最怕就係咁, 一路要鼓勵, 要用小食誘導, 已經比平常勞累十倍, 再遇上隻豬仔連小食都無興趣, 真係想叫救命! 我已經每次出去都用唔同嘅小食, 等有多D新口味去刺激佢哋架啦!
好辛苦咁哄佢行咗一段路, 一轉落下一條街, 就有另一番景像喇; 波波見到遠處有隻西摩, 佢成隻精神晒, 係咁向前跑, 我一方面開心佢有番精神, 另一方面又擔心, 因為隻狗好大呀!
可能大狗嘅主人都有顧慮, 唔想同細狗玩怕有意外又麻煩, 隻西摩主人好快拖咗狗狗掉頭走!
繼續行落去, 見到兩隻放繩嘅西施, 波波就係咁跑過去, 大聲吠; 呢隻仔幾時先學到唔好咁嘈呀, 我好尷尬嘛; 不過好彩佢細細隻, 狗哋主人唔驚佢, 仲叫我由得佢, 一陣無事喇, 佢話波波少社交係咁喇, 多D見其他狗狗就唔會吠啦!
真係多謝佢哋, 大部份狗主都咁體諒!
 |
| 見到其他狗狗, 好想做朋友? |
 |
| 波波好激動, 係咁對住狗狗吠呀! |
 |
 |
 |
| 隻西施仔對達達友好D, 去車仔旁邊問好?! |
 |
| 果然無耐佢哋就可以和平相處喇! |
 |
| 狗哋走時波波仲想跟住佢哋 |
 |
| 睇波波幾激動, 嚇死狗咩!! |
 |
| 狗狗熱身後開始有互動喇! |
 |
| 後來仲可以排排坐添! |
佢哋都笑起上嚟, 話佢狗仔細細, 心口掛住個勇字; 我就最怕佢咁, 會激嬲其他狗嘛, 一陣狗哋嬲起上嚟, 咬佢一啖就死啦, 所以真係唔敢行近D大狗!
咁大家都傾談咗一陣, 波波都冷靜落黎, 兩隻狗狗後來都可以一齊行咗一陣!
跟住嚟咗隻黑松, 貴婦仔走咗過去打招呼, 我見到人哋狗狗咁平和, 好羨慕呀; 不過波波就無再吠, 然後, 仲好冷靜咁行過去同隻黑松打招呼呢! 波波好叻仔呀, yeah~~
 |
| 見到其他狗狗咁friend, 我好希望波波都得呀! |
 |
| 但波波今次竟然無吠! |
 |
| 仲可以好平靜咁行過去, 波波好叻仔呀, 佢都得架! |
跟住帶達達去番相同地方練習, 隻豬女都係無乜進步, 但都算肯行吓, 只要佢唔驚, 肯嘗試落去, 我諗比多D時間佢啦 !
我好期待兩隻豬仔可以一齊行呀!
結果今次散步, 足行咗有兩個多鐘, 番嚟食完午餐, 佢哋就去咗瞓覺豬lu, 今日好開心呢!
 |
| 隻豬女就係咁, 行吓停吓! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
