 |
| 兩隻一齊拖好有難度, 步伐唔一至, 又或者一隻行, 一隻唔肯行! |
唔知幾時開始, 寫呢個blog好似變咗寫日記, 習慣性咁每日記錄低兩隻豬仔嘅生活作息; 自己睇番, 原來為咗佢哋, 我真係作出咗好多改變!
今日如常帶佢哋出去, 試下行唔同嘅路, 不過唔知點解, 波波今日又唔係好肯行, 行得好慢又不時坐低, 呢位大少真係好難捉摸; 我都唔勉強佢喇, 行咗15分鐘左右就放番佢上車啦!
達達豬今日都試行新地方, 當然係比較緊張, 今日比佢試吓行斜路; 又唔係想像中咁差, 佢都肯嘗試, 不過跟係我腳邊行得較好, 可能有依賴放心D啦!
回程時見到一隻好大好靚嘅牧羊犬, 呢個品種算係大狗中我無咁驚嘅, 因為感覺上佢哋唔惡, 好純品, 不過我都係未有勇氣比豬仔接觸咁大嘅狗, 尤其波波今日仲不在狀態!
我諗要佢哋克服唔驚大狗, 都係先要我自己唔驚! 想當年我連細狗都驚, 諗唔到自己有一日竟然會養狗, 仲去到人稱'狗痴'嘅程度, 希望有一日, 我真係可以企喺大狗身邊都唔驚啦!
 |
| 行斜路有D緊張喇! |
兩隻豬仔今日都行少左, 早D番屋企飲湯算喇, 今日煲木瓜竹蔗黑豆湯, 都係佢哋好鍾意飲嘅湯之一, 飲完就要瞓覺豬喇, 睡得好, 身體好嘛!
 |
| 好醒瞓呀, 一按快門即醒! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
