知錯要改

準備好就開始行行喇!

昨日同波波練習明顯係失敗嘅, 有D氣餒; 不過今日又係另一天啦, 抖起精神再嚟過!

今日早上同佢哋出去, 如常同佢哋穿好狗帶, 噴防虫劑, 跟住要放佢哋上車仔; 離開屋苑範圍先可以還佢哋自由喇, 因為大堂等公共地方禁止狗狗落地嘅!

一切準備就緒, 叫佢哋過嚟上車, 其實平日佢哋見到架車, 知道係去街街時間, 唔駛叫已經第一時間企係車旁邊等候; 豆b同達達好快走過嚟, 呢個係達達豬最勇敢嘅時候喇!
抱咗佢兩個上車, 就發覺波波匿藏係佢張屋仔床度; 我個心即刻一沉, 立刻意識到昨日我一定係太急進, 太嚴厲咁用錯方法去糾正波波撲吠嘅行為;  呢個仔咁敏感, 一定唔開心喇!

我明知係出咗問題, 但唔可以對佢呵護, 如常打開大門, 推車仔出去, 口中就叫波波去街喇!

佢好快走番出嚟, 謝謝天!

我昨日係做得唔好, 但我都係在學習階段, 我都會做錯嘛!

仔呀仔! 一齊嚟過囉, 唔好咁情緒低落啦!

落到街, 我先整理好自己嘅情緒, 盡量放鬆就抱波波落地, 佢都算行得幾好; 遠處見到兩隻貴婦, 我照帶波波往前行, 原本準備見到波波情緒有異就及時轉移佢諗法(昨日我太高估佢嘅反應, 見佢之前無吠, 就想驗証佢係咪可以控制好情緒, 失咗控制嘅先機), 點知我哋未行近, 就見到對方主人抱起兩隻狗狗, 轉身走人! 
我即刻笑咗出黎, 因為我見到以前嘅自己!
之後就無再遇見其他狗狗喇, 今日佢好平靜咁行咗40分鐘!

達達見我比波波飲水, 知道輪到下一位喇, 佢好積極立刻係車仔企咗起身; 呢個都係一個進步, 我好開心! 係咁我比佢行第二啦, 佢好好笑嘅, 跟住架車仔行得好專心, 即使我叫佢, 佢都係望一望我, 好似話比我聽, "你唔好叫我, 我努力練習緊, 我唔可以分心架:)"

 

下一位豆b, 佢唔鍾意慢慢行嘅, 拖住佢慢步佢隨時拌跌我, 因為佢時行左時行右, 好難行直線, 但跑步呢, 就非常好, 咁我拖佢慢步跑啦, 都ok嘅!

三隻豬仔行咗差唔多兩個鐘, 開心晒! 番去食完午餐, 仲飲咗佢哋鍾意嘅蓮藕湯, 跟住要聽音樂瞓覺喇!

 

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！