 |
| 波波今日心情超靚 |
昨日波波咁失控, 一定要搵出問題嘅癥結, 先可以解決問題嘛, 作晚即刻搵高人教路; 預計今日係假日, 應該都會見到好多狗狗, 我唔想佢又好似作日咁激動呀!
將昨日同波波出去嘅過程, 好詳細咁同朋友講咗, 佢就叫我檢討吓邊度出錯! 我真係唔知喎, 已經聽從好多人提點, 同佢出去散步, 等佢可以釋放壓力, 同見多D狗狗嘛!
朋友話散步當然係要啦, 但我開始比佢自己腳仔踏落地無耐, 即係波波都未係好習慣, 佢出去免不了緊張; 尤其之前我每見到其他狗狗, 不自覺就將拖帶拉緊, 慌死佢會比其他狗狗襲擊, 其實呢一連串嘅反應, 都比波波接收晒; 佢已經認定所有狗狗都係對佢不利, 是以佢本能保護自己, 當然係大聲去吠, 去撲咁嚇退敵人啦, 佢無錯喎!
佢話錯嘅係我, 一時就唔比佢行近其他狗狗, 但突然就要佢同其他狗狗做朋友, 死命拖佢埋去合群, 根本波波都唔知果D是敵是友!
唉! 又做錯, 咁依家要點呀, 救命!!!
朋友叫我要一步一步慢慢黎, 佢話先要比波波知道其他狗狗唔係敵人, 基本即係條路咁闊, 你有你行, 我有我行, 喺佢未有信心同其他狗狗相處, 唔好拖佢行埋其他狗狗度!
佢叫我今日拖住波波, 見到其他狗狗, 就拖佢直行直過, 就好似我哋人類見到通街人, 都唔會個個打招呼啦; 當見到佢意圖想吠, 就轉移佢注意, 拖緊拉帶, 帶佢向前行! 然後來回做多幾次, 比佢見到狗狗, 就如大家見路人甲一樣, 等佢習慣街上係有其他同類嘅, 但對佢無傷害, 媽媽喺佢身邊一齊行, 會保護到佢!
今日, 佢心情好好, 希望係一個好嘅開始!
行咗長長嘅一條路, 無見到狗狗! 轉咗落熱點, 見到狗狗喇! 有主人拖住隻哥基, 我見波波意圖跑過去, 我拉緊拖帶, 繼續向前行, 唔望隻狗亦唔望佢, 就好似無任何事發生一樣; 佢跟住我行, 但頻頻回頭望隻哥基, 但無吠!
跟住見到貴婦, 八哥, 我都係咁做, 拖住佢直行直過; 佢每次都想朝住人家狗狗嘅方向跑過去, 但我無比佢咁做; 我帶住佢來回練習, 即使有狗狗吠住想衝過嚟, 我都無理, 照行!
波波係有回頭望嘅, 但全日無吠過! 途中遇到昨日嘅狗主, 佢話波波今日表現好叻, 我同佢傾談咗兩句, 係相隔一個距離, 無比狗狗有接觸!
朋友叫我多帶波波練習, 直到佢見到其他狗狗都無想撲想吠, 可以好自如咁我行我素, 見慣咗先開始嘗試帶佢識朋友仔啦!
一定要佢理解狗狗唔係敵人, 咁佢先唔會驚, 唔會咁激動亂吠亂撲, 平靜下先可以交朋友嘛!
當然佢提醒我要做好自己, 要放鬆先; 如果主人唔作出改變, 做任何訓練都唔可以改變情況啦!
今日做咗好多練習, 佢無壞情緒, 我帶佢同豆b跑咗好耐, 跟住比達達試下同佢哋一齊; 但唔係老地方, 達達明顯緊張, 我唔敢勉強, 帶佢哋落下一站!
達達去番舊地, 好開心咁行, 行咗好耐, 不過佢要一路跟住我! 佢仍欠缺一D安全感, 唔敢自己行, 但佢跟得唔錯, 我好滿意喇!
比三隻豬仔玩咗一陣, 太大風喇, 都差不多晚餐時間, 今日運動量超額完成!
明日繼續努力!!!
 |
| 喺呢處行得唔好, 會緊張! |
 |
| 嘩, 咁大風就嚟吹起d豬仔喇! |
 |
| 行埋d玩啦! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
