 |
| 少爺仔又玩乜嘢呀? |
今日又帶D豬仔出去行街街, 因為豆B嚟咗渡假, 咁當然會帶埋佢出去啦; 同工人姐姐二人三狗一齊出發! 本來想拖波波同豆B一齊行嘅, 但波波呢位少爺仔真係難服侍, 成日都行吓坐吓, 隻豆就興奮到死, 係咁向前衝, 步伐咁唔一至, 我真係攪唔掂, 都係一隻一隻嚟啦, 我諗要一齊行真係未到時候, 波波情緒仲未係穩定!
放番豆豆上車仔, 同達達一齊遊吓車河先啦, 我拖波波先行!
行咗無耐見到有個工人姐姐, 拖住隻Hush Puppy果種巴薩亨犬, 波波無吠狗哋, 乖仔!
我見過呢隻狗狗同工人姐姐好多次喇, 但每次都見狗狗坐喺地上, 工人姐姐唔係同朋友傾偈, 就係坐喺度講電話, 我真係咁啱一次都無見過呢隻狗狗行嘅, 即使係大熱天時, 狗狗都係咁爬喺熱辣辣嘅地上, 呢隻狗狗真可憐!
放狗, 都係一個親子活動, 如果連呢個時間都騰唔出, 我諗養迷你型嘅狗狗會適合D, 起碼佢哋運動量唔大, 又或者乾脆唔好養啦, 總好過要全倚靠工人, 狗狗帶咗落樓都係齋坐, 主人又唔知!
再同波波轉落下一條路, 見到一隻拖住繩嘅哥基, 我見波波啱啱都無吠, 以為呢幾日見過咁多狗狗, 佢習慣咗啦, 點知隻仔突然就發晒癲大聲狂吠, 仲係咁衝過去! 我拖住佢都仲係發力咁向前衝, 我驚扯傷佢嘛, 唯有抱起佢行啦; 離開咗視線範圍, 再放低佢行過, 跟住再遇見一隻貴婦, 一隻白松, 隻豬仔反應都係一樣; 我日日咁同佢行, 又比佢結識其他狗狗啦, 佢就忽冷忽熱, 究竟想點呀? 救命!!
下一轉就輪到豆豆啦, 最輕鬆就係拖呢隻豬女行, 佢一落街就已經好high, 放落地就係咁跑呀跑, 完全忘我; 原來自細有社交嘅狗狗真係唔同, 佢媽媽自細就帶佢去各種聚會, 接觸唔少大大細細嘅狗狗, 所以佢個性樂天, 情緒亦好穩定!
再黎就到達達喇, 雖然一放佢落地, 佢好似隻盲頭蒼蠅咁亂咁舂, 完全無特定方向, 但睇得出佢好enjoy呢個散步, 佢自己係咁不停亂咁撞, 行吓又跑吓, 停都無停過!
 |
| 達達都好叻女呀! |
我會keep住呢個親子活動, 繼續帶佢哋出去每日散步, 接觸外界, 希望會有再進一步嘅改進啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
