 |
| 洗完白白舒服晒！ |
其實琴日都好攰, 今日本來想好好休息下嘅, 但聽天氣報告又話下週轉涼, 唯有撐落去同佢哋沖涼啦! 一般我都係3星期先同佢哋沖涼一次, 以前少比佢哋落地行就好ok, 反正沖涼太密係有害無益; 但近來多咗行街, 兩星期左右都開始覺得D毛毛唔係咁爽喇, 拖到3星期真係極限, 再唔沖真係唔得喇!
本來以為唔駛番工, 會有好多空閒時間, 當初諗住辭職都真係諗咗好耐, 好怕時間太多會好無聊! 但原來湊呢兩隻豬仔真係好忙, 只要每件事都堅持親力親為嘅話, 就一定唔會無嘢做!
習慣每朝早8點餵佢哋食藥, 咁即係我7點多就要起床準備佢哋早餐, 餐後就餵藥; H醫生曾親自打過電話比我, 提醒我餵藥嘅時間要穩定, 唔好時早時遲, 咁先可以控制好病情; 而呢個餵藥時間始於當時我仲要番工, 所以一定要早上親自餵咗佢哋先放心出門口! 雖然依家時間比較寬鬆, 但都唔可以隨便更改呢個時段, 因為佢哋每次覆診驗血, 一定要服藥後4-6小時之內, 咁中午同佢地驗血一般都已經係診所上午嘅last appointment喇！
我諗定時服藥真係好緊要, 所以達達同波波嘅甲狀腺病都touch wood控制得好好！
餵完佢哋, 又要等同佢哋拾便便啦, 呢樣都唔可以假手於人; 因為身體有無唔妥, 好多時都會從便便反映出嚟, 尤其依家食肉, 我仲要留心多咗, 便便太乾要增加油份, 太淺色又要減少鈣質等等.....
忙完佢哋, 自己食個早餐, 上上網, 又係時間準備佢哋午餐, 然後自己食完午飯, 都差不多要帶佢哋去散步喇!
行完番嚟, 例牌清潔梳毛, 仔細檢查一番, 都唔會少得過兩個鐘!
無特別事都覺時間唔夠用, 有其他約會嘛, 哈哈, 真係好似忙過番工果時呢！
 |
| 達達豬笑容好甜呢！ |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
