 |
| 對我嚟講, Ｎo.2 好難做得到:( |
"人無遠慮, 必有近憂", 呢句嘢真係最正確不過, 尤其applied喺我呢種咁緊張嘅人身上!
前晚同幾隻豬仔做例行清潔, 見到豆b尿尿嘅地方好dirty, 咁就同佢清洗乾淨, 然後修短週圍嘅毛毛, 估唔到咁就出事喇!!
修完毛後佢表現好唔正常, 行兩步就坐低尖聲呱呱叫, 我真係比佢嚇死, 我自己係100%肯定其他地方無剪親, 咁我都諗住佢比較敏感同大喊十, 過去同佢驗血佢表現一向都係咁嚇人, 總知支針都未吉落嚟, 佢就大聲尖叫, 真係叫到驚天動地咁!!
琴日一早起身, 佢好乖咁屙咗好大篤尿尿, 精神胃口都正常, 咁我就比較放心; 點知一整日佢都keep住間唔中尖叫, 又行兩步就坐低, 將私處壓向地下, 最明顯係佢少咗去尿尿, 我開始又驚喇......
即刻打電話去booking想帶佢出去比醫生睇吓, 諗唔到咁修吓毛都攪成咁! 可惜又係fully booked, 仲要等過埋今日, 因為係紅色假期唔開診!
同朋友A講起呢個問題, 佢話佢狗狗都曾經試過, 之前帶狗狗出去美容, 美容姐姐同狗狗剃咗下面嘅毛, 好多主人都鍾意咁, 諗住會乾淨D; 但佢狗狗就好唔習慣, 結果反應同豆B大同少異, 都係唔敢尿尿, 喺度死忍!
佢叫我唔駛太擔心, 應該係剪短咗毛感覺有D吉吉吓, 遲吓佢會習慣, 佢話上次佢嘅狗狗過咗成個星期先好D!
都無辦法啦, booking係明日, 咁都係觀察住先啦!
今早起身佢好正常咁尿尿, 食完早點有正常便便, 情況比琴日有進步, 但都係唔想行; 除咗開餐嗰時佢好正常咁跑, 嗰個時候佢就完全正常咁跑黎跑去仲團團轉添, 睇見佢咁我都比較放心!
有時自己諗咁去睇醫生係咪好攪笑? 我有同佢探熱, 小心睇過佢每個部位都搵唔出係乜嘢原因!
我呢種人係咪小題大做? 自尋煩惱? 養狗狗養到咁神經緊張!!!
對我嚟講"free your mind from worries"真係唔容易做到, 即使我努力叫自己放鬆, 但性格始終改變唔到 😓 !!!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
