 |
3隻豬仔食咗supplement都有一段時間喇，等我做個回顧先!
波波半年前確診有骨刺，食咗vetri disc都有半年喇，如果上次佢行得唔好祇係抽筋，同骨刺扯唔上關係，即係半年來都無復發，咁應該呢隻補充品都係有幫助，可以keep住比佢繼續食落去啦!
達達豬食咗鱉蛋粉都有一個月喇，生毛方面唔係好明顯，但毛質方面就見到有改善，摸上手比以前柔軟，亦較前有光澤，無之前咁乾旱，咁呢隻都算係一隻唔錯嘅補充品，值得比佢繼續試落去!
豆b試紫錐花只得4日，今日先開始比正常份量，我當然唔可以咁心急，希望持之以恆呢隻補充品可以幫到佢，改善佢咁敏感嘅體質啦!
其它嘅supplement，3隻豬仔都各有服用，好似immunity, food for joints, OPC等等; 不過我就唔識分辨有無效用，因為話增強免疫力，咁真係好難知道成效係如何!
朋友A話我太focus喺生毛方面，隻supplement食咗無長毛, 唔代表喺其它方面無幫助，例如達達比之前勇於嘗試，夠膽出外行行，可能某方面都係幫咗佢, 令佢更有活力同精神咗!
又例如波波以前皮膚好敏感，好多時都會出現紅點, 呢D都無咗喎，咁係咪都有一定嘅幫助呢?
波波皮膚嘅問題，我會歸究於係轉咗糧嘅關係，自從轉咗脫水菜加肉肉，我真係見到佢皮膚毛髮都好咗，連豆b喺呢方面都有明顯改善，不過唔可以否定補充品都有幫上一把忙啦!
我一直咁努力去搵補充品嘅資料，都係希望佢哋健健康康，身體有嘅毛病得以改善， 我希望波波背部骨刺唔好惡化，達達甩毛情況可以好轉，豆b呼吸道問題可以緩和落嚟啦!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
