10號風球

琴晚打起大風, 10號風球高高掛起, 原來上一次掛10號波, 已經係13年前! 

我住呢頭一直都風平浪靜, 無太大感受到呢個風嘅威力, 只喺電視上同朋友間傾談中, 見証到橫風橫雨嘅感覺!

日間如常, 無特別感受, 從無諗過呢個風真係會打到嚟; 當天文台宣報, 將要掛上8號波, 先有打風嘅感覺, 一方面叫阿女要小心路面情況, 一方面開電視睇吓呢個風有幾強!

一路到深夜, 四週都好平靜, 3隻豬都好早瞓咗!
我呢個夜鬼, 真係唔慣早瞓, 無嘢做都東拉西扯, 硬係唔肯上床; 唔係上網就刨小說, 總知拖到好眼瞓先會投降!

感覺剛進入夢鄉, 就比強風嘈醒, 真真實實感受到呢個風有幾強勁, 外面吹到砰砰澎澎; 本來幾隻豬仔都已經瞓咗, 特然間達達好大聲咁叫起上嚟, 半夜三更佢真係未試過咁樣, 呢隻細膽豬仔一定比D風聲嚇壞喇!

 好彩隻豬豆聞風不動, 一於照瞓, 我有D羨慕呢隻豬女, 佢傻吓傻吓, 樂天知命, 頭腦簡單; 原來動物同人都係有不同性格, 豆B嘅性格最好, 總之唔打到埋身佢乜都好少理; 可惜波波細時多病過於嬌縱, 達達生性又太敏感, 無辦法唯有抱埋佢哋上床!好彩強風唔係吹咗好耐, 感覺一切平靜, 就比佢哋落床, 根本同佢哋一齊, 我都唔敢瞓, 又怕壓親佢哋, 又怕跌咗佢哋落床!

今日一早醒來, 好似琴晚完全無瞓過一樣! 從窗口望向外面, 一切都回復正常; 不過工人姐姐落去樓下超市, 佢話走咗出去路面睇過, 好多大樹都瞓低咗!

香港都算係一個福地囉, 咁強勁嘅暴風雨, 都算無做成太大嘅人口傷亡！

要多謝前線工作人員, 依然緊守崗位, 從一場風暴見証到佢哋冒住生命危險、仍然盡全力為香港服務.

希望我哋少D埋怨, 多D體諒, 締做一個更美好嘅將來!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！