 |
| 嚇完我一輪佢又無晒事咁喇！ |
今日一早起身, 就比波波嚇到我魂飛魄散!
每日如常, 餵完佢哋早餐同食藥後都會再瞓一陣, 一切同平常無分別, 正常時間咁起身; 波波係同我一齊瞓嘅, 咁我如常放佢落地, 等佢去廁所尿尿啦, 我當然無特別留意佢; 點知工人姐姐呢個時間, 去完買餸番嚟, 佢一開門就大聲叫我, 叫我快d睇吓波波, 佢行得好唔正常呀!
當我見到波波嘅情形, 我真係嚇到死咗, 個腦一片空白, 手腳都震埋; 波波果時係弓起個背, 左後腳好唔自然, 好似失去控制行路嘅能力, 但又好想行, 於是行到彈彈咁跳, 佢個樣好驚, 口仔有泡, 條脷都紫色埋!
我立刻將佢抱起, 掃住佢個背, 叫佢唔駛驚, 其實我自己就驚到要命, 手震震咁撥電話, 搵Hsiang醫生!
點解每次波波有事都係星期日呀, 我都唔記得咗, 今日Hsiang醫生係day off, 咁佢診所嘅姑娘, 就叫我去太平道診所, 上次波波証實有骨刺, 我都心中有數, 一路擔心會有呢一日到黎OMG!
太平道診所話佢地booking全滿晒喇, 要睇都要等到月尾, 咁死啦! 忙亂起嚟, 真係乜都唔識做, 即刻搵朋友S同J商量啦, S叫我同Hsiang醫生聯絡吓, 問佢我應該點做!
呢個時候嘅波波, 已經正常番晒, 又喺度兩頭轉, 仲跳起上嚟, 佢好似唔記得咗頭先嘅事, 凈係嚇倒媽媽囉!
我pm咗Hsiang醫生, 佢好快覆我, 佢叫我唔駛太擔心住, 如果佢行得走得就無急切嘅問題, 因為有好多原因, 有好多可能性, 例如神經痛、抽筋、or other else, 要做檢查來排除可能性; 佢叫我如果再有咁嘅事, 要拍低video, 比醫生睇吓有幫助斷症, 仲話再有事就唔好等, 要即刻出去搵其他醫生檢查!
同Hsiang醫生傾完, 我就比較安定喇, 見隻衰豬都無事, 唔喺我視線範圍內就將佢困籠, 要確保佢唔可以再跳嘛!
希望佢唔會好大件事啦, 希望係我自己嚇自己, 因為僭意識下我好怕佢有咁嘅反應，一有事就諗咗最壞先啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
